ମୁମ୍ବାଇ: ପୂର୍ବତନ ମୁମ୍ବାଇ କ୍ରିକେଟର ଓ "କଙ୍ଗା ଲିଗ" ଷ୍ଟାର ମେହଲି ଇରାନିଙ୍କ ପରଲୋକ । ଦୁବାଇରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ଭେଟେରାନ ଇରାନିଙ୍କୁ 90 ବର୍ଷ ବୟସ ହୋଇଥିଲା ।
ମୁମ୍ବାଇରେ ମୌସୁମୀ ସିଜିନରେ ଖେଳାଯାଉଥିବା କ୍ରିକେଟ ଟୁର୍ଣ୍ଣାମେଣ୍ଟ କଙ୍ଗା ଲିଗ ଭାବେ ବେଶ ପରଚିତ । ମୁମ୍ବାଇ କ୍ରିକେଟ ଆସୋସିଏସନ(MCA) ଆପେକ୍ସ କାଉନସିଲ ସଦସ୍ୟ ଓ ପ୍ରଖ୍ୟାତ କ୍ୟୁରେଟର ନାଦିମ ମେନନ, ଇରାନିଙ୍କ ଦେହାନ୍ତ ସୂଚନା ଦେଇଛନ୍ତି ।
ବାମହାତୀ ବ୍ୟାଟ୍ସମ୍ୟାନ ଓ ୱିକେଟ କିପର ଇରାନି, ପ୍ରାୟ 50 ବର୍ଷ କଙ୍ଗା ଲିଗ ଖେଳିଛନ୍ତି । ଏଥିସହ କ୍ଳବ ସ୍ତରରେ ବମ୍ବେ ଜିମଖାନା ଓ ପାର୍ସି ସାଇକେଲିଷ୍ଟର ପ୍ରତିନିଧିତ୍ବ କରିଛନ୍ତି । ବର୍ଷ 1953-54ରେ ବମ୍ବେ ପାଇଁ(ବର୍ତ୍ତମାନ ମୁମ୍ବାଇ) ଏକମାତ୍ର ମ୍ୟାଚ ବରୋଦା ବିପକ୍ଷରେ ଖେଳିଛନ୍ତି ।
ନାରି କଣ୍ଟ୍ରାକ୍ଟର, ଫାରୋଖ ଇଞ୍ଜିନିୟର, କରସନ ଘାବ୍ରି ଓ ଗୁଲାମ ପାର୍କର ଇରାନିଙ୍କ ଅଧିନରେ ଖେଳିଛନ୍ତି । ପୂର୍ବତନ ଭାରତୀୟ କ୍ୟାପଟେନ କଣ୍ଟ୍ରାକ୍ଟର ଇରାନିଙ୍କ ମୃତ୍ୟୁରେ ଦୁଃଖ ପ୍ରକାଶ କରିବା ସହ ଶ୍ରଦ୍ଧାଞ୍ଜଳି ଜଣାଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
