ଦୁବାଇ: ଚଳିତ ଆଇପିଏଲ ଟୁର୍ଣ୍ଣାମେଣ୍ଟରେ ଆଜି (ଗୁରୁବାର) ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବ ଏକ ଗୁରୁତ୍ବପୂର୍ଣ୍ଣ ମ୍ୟାଚ । 40ତମ ମ୍ୟାଚରେ ରାଜସ୍ଥାନ ରୟାଲ୍ସ ଓ ସନରାଇଜର୍ସ ହାଇଦ୍ରାବାଦ ମଧ୍ୟରେ ହେବ ମୁକାବିଲା । ତେବେ ଏହି ମ୍ୟାଚ ରାଜସ୍ଥାନ ରୟାଲ୍ସ ପାଇଁ କର ବା ମର ହୋଇଛି । ଷ୍ଟିଭ ସ୍ମିଥଙ୍କ ରୟାଲ୍ସ ଟିମର ପ୍ଲେ-ଅଫ ପର୍ଯ୍ୟାୟକୁ ଉନ୍ନୀତ ଆଶା କ୍ଷୀଣ ରହିଛି । ଏହି ମ୍ୟାଚରେ ବିଜୟ, ପଏଣ୍ଟ ଟେବୁଲର ଉପରକୁ ଉଠିବା ସହ ଟୁର୍ଣ୍ଣାମେଣ୍ଟର ପରବର୍ତ୍ତୀ ପର୍ଯ୍ୟାୟରେ ପହଞ୍ଚିବା ସମ୍ଭାବନାକୁ ଉଜ୍ଜୀବିତ ରଖିବ । ଫଳରେ ବିଜୟ ଲକ୍ଷ୍ୟରେ ପଡିଆକୁ ଓହ୍ଲାଇବ ରାଜସ୍ଥାନ ।
ଅନ୍ୟପଟେ ସନରାଇଜର୍ସ ହାଇଦ୍ରାବାଦ 6 ପଏଣ୍ଟ ସହ ପଏଣ୍ଟ ଟେବୁଲର 7ମ ସ୍ଥାନରେ ରହିଛି । ଏହି ମ୍ୟାଚରେ ବିଜୟ ସହ 5ମ ସ୍ଥାନକୁ ଲମ୍ଫ ପ୍ରଦାନ କରିବା ଲକ୍ଷ୍ୟରେ ରହିବ ଡେଭିଡ ୱାର୍ଣ୍ଣରଙ୍କ ଅରେଞ୍ଜ ଆର୍ମୀ । ବ୍ୟାଟିଂରେ ବେନ ଷ୍ଟୋକ୍ସ, ସଞ୍ଜୁ ସାମସନ ଓ ରବିନ ଉଥାପ୍ପାଙ୍କ ପ୍ରଦର୍ଶନ ରାଜସ୍ଥାନ ପାଇଁ ମହତ୍ବପୂର୍ଣ୍ଣ ରହିବ । ପରେ କ୍ୟାପଟେନ ସ୍ମିଥ ଓ ବଟଲରଙ୍କ ଠାରୁ ପୂର୍ବ ମ୍ୟାଚ ପରି ପ୍ରଭାବୀ ପ୍ରଦର୍ଶନ ଆଶା ରହିବ । କର ବା ମର ମ୍ୟାଚରେଯୁବ ଖେଳାଳି ରିଆନ ପରାଗ ଓ ରାହୁଲ ତେୱାତିଆଙ୍କ ଠାରୁ ଅନ୍ୟ ଏକ ମ୍ୟାଚ ବିଜୟ ଇଂନିସ ମଧ୍ୟ ଆଶା ରଖିବ ଟିମ ।
31ଟି ମ୍ୟାଚରୁ 39 ୱିକେଟ ସହ ରାଜସ୍ଥାନର ସର୍ବାଧିକ ୱିକେଟ ହାସଲକାରୀ ବୋଲର ଜୋଫ୍ରା ଆର୍ଚରଙ୍କ ଉପରେ ପୁନଃ ବୋଲିଂ ବିଭାଗ ନିର୍ଭର କରିବ । ଶ୍ରେୟସ ଗୋପାଳ, ଅଙ୍କିତ ରାଜପୁତ ଓ କାର୍ତ୍ତିକ ତ୍ୟାଗୀଙ୍କୁ ମଧ୍ୟ ଶ୍ରେଷ୍ଠ ପଦର୍ଶନ କରିବାକୁ ହେବ ।
ଅନ୍ୟପଟେ 2016 ସଂସ୍କରଣର ଆଇପିଏଲ ଚମ୍ପିଆନ ହାଇଦ୍ରାବାଦକୁ କେବଳ ବିଜୟ ହିଁ ଟୁର୍ଣ୍ଣାମେଣ୍ଟରେ ସୁରକ୍ଷିତ ରଖିପାରିବ । ପ୍ଲେ-ଅଫ୍ ସ୍ଥାନ ପାଇଁ ନିଶ୍ଚିନ୍ତ ବିଜୟ ଆବଶ୍ୟକ ସହ ପଏଣ୍ଟ ଟେବୁଲର ଉପରକୁ ଉଠିବାକୁ ଟିମ ପାଖରେ ରହିଛି ଶେଷ ସୁଯୋଗ । ଜନ୍ନି ବେୟାରଷ୍ଟୋ, ମନିଷ ପାଣ୍ଡେ ଓ କେନ ୱିଲିୟମସନଙ୍କ ଉପରେ ବ୍ୟାଟିଂ ଭାର ରହିବ । ତେବେ କେନ ୱିଲିୟମସନଙ୍କ ଆହତ ଟିମ ପାଇଁ ଚିନ୍ତାର କାରଣ ହୋଇଛି । ଯୁବ ଖେଳାଳି ଅବଦୁଲ ସମାଦ ଓ ବିଜୟ ଶଙ୍କରଙ୍କୁ ମଧ୍ୟ ଏହି ମ୍ୟାଚରେ କମାଲ କରିବାକୁ ହେବ । ଷ୍ଟାର ସ୍ପିନର ରସିଦ ଖାନ 55ଟି ମ୍ୟାଚରୁ 66 ୱିକେଟ ସହ ହାଇଦ୍ରାବାଦର ସର୍ବାଧିକ ୱିକେଟ ହାସଲକାରୀ ବୋଲର ରହିଛନ୍ତି । ଫଳରେ ଆଜି ଖେଳାଯିବାକୁ ଥିବା ରାଜସ୍ଥାନ ବିପକ୍ଷ ମ୍ୟାଚରେ ରସିଦଙ୍କ ଠାରୁ ବିଜୟ ପ୍ରଦର୍ଶନ ଆଶା ରହିଛି ।