ଦୁବାଇ: ସୁପରସନଡେର ଡବଲ ହେଡର ମ୍ୟାଚ ବେଶ୍ ରୋମାଞ୍ଚକର ରହିଥିଲା । ରବିବାରର 2ଟି ମ୍ୟାଚର ଫଳ ସୁପରଓଭରରେ ହିଁ ସାମ୍ନାକୁ ଆସିଥିଲା । ବିଶେଷ କରି ଡବଲ ହେଡରର 2ୟ ମ୍ୟାଚ ମୁମ୍ବାଇ ବନାମ ପଞ୍ଜାବ ବେଶ୍ ରୋମାଞ୍ଚକର ରହିଥିଲା । ଲିଗ୍ର ଏହି 36ତମ ମ୍ୟାଚରେ ଡବଲ ସୁପରଓଭର ଦେଖିବାକୁ ମିଳିଥିଲା । ଏହି ସୁପରଓଭରରେ ମୁମ୍ବାଇକୁ ମାତ୍ ଦେଇ ଲିଗ୍ର 3ୟ ବିଜୟ ହାସଲ କରିଛି ପଞ୍ଜାବ । ମ୍ୟାନ ଅଫ ଦି ମ୍ୟାଚ ହୋଇଛନ୍ତି ପଞ୍ଜାବର ଅଧିନାୟକ କେଏଲ ରାହୁଲ ।
ମୁମ୍ବାଇ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ 176ରନ୍ ସଂଗ୍ରହ କରିଥିଲା । ପଞ୍ଜାବ ବି ନିର୍ଦ୍ଧାରିତ ଓଭରରେ 6 ଓ୍ବିକେଟ ହରାଇ176ରନ ସଂଗ୍ରହ କରିଥିଲା । ଫଳରେ ମ୍ୟାଚ ଡ୍ର ହୋଇ ସୁପରଓଭରରେ ପହଞ୍ଚିଥିଲା । ପ୍ରଥମ ସୁପରଓଭରରେ ପଞ୍ଜାବ ପ୍ରଥମେ ବ୍ୟାଟିଂ କରି 5ରନ୍ କରିଥିଲା । ମୁମ୍ବାଇ ବି ସୁପରଓଭରରେ 5ରନ୍ କରି ମ୍ୟାଚକୁ ଆଉ ଗୋଟିଏ ସୁପରଓଭରରେ ପହଞ୍ଚାଇଥିଲା ।
ଏହି 2ୟ ସୁପରଓଭରରେ ମୁମ୍ବାଇ ପ୍ରଥମେ ବ୍ୟାଟିଂ କରି 11ରନ୍ କରିଥିଲା । ପଞ୍ଜାବ 4ଟି ବଲ୍ରେ 12ରନ୍ ସଂଗ୍ରହ କରି ମ୍ୟାଚକୁ ନିଜ ନାଁରେ କରିଥିଲା । ଆଇପିଏଲରେ ଏହା ପ୍ରଥମ 2ଟି ସୁପରଓଭର ପରେ ବିଜେତା ମିଳିବା । ତେବେ ପଞ୍ଜାବର ଏହି ବିଜୟ ପରେ ପଏଣ୍ଟ ତାଲିକାର 6ଷ୍ଠ ସ୍ଥାନକୁ ଉଠିଛି ଦଳ ।
ପଞ୍ଜାବ ପକ୍ଷରୁ ଅଧିନାୟକ କେଏଲ ରାହୁଲ ସର୍ବାଧିକ 77ରନ୍ (51ବଲ୍)ର ପାଳି ଖେଳିଛନ୍ତି । ଏହି ଦମଦାର ଇଂନିସରେ 7ଟି ଚୌକା ଓ 3ଟି ଛକା ସାମିଲ ରହିଛି । ରାହୁଲଙ୍କ ବ୍ୟତୀତ କ୍ରିସ ଗେଲ 24, ନିକୋଲାସ ପୁରୋନ 24, ମୟଙ୍କ ଅଗ୍ରୱାଲ 11, ଦୀପକ ହୁଡ୍ଡା 23*, କ୍ରିସ ଜୋର୍ଡାନ 13* ରନ୍ ସଂଗ୍ରହ କରିଥିଲେ ।