ହାଇଦ୍ରାବାଦ:ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ଘୋଷଣା କଲେ ୱିକେଟକିପର ବ୍ୟାଟ୍ସମ୍ୟାନ ନମନ ଓଝା । 37 ବର୍ଷୀୟ ନମନ ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ନେବାକୁ ନିଷ୍ପତ୍ତି ନେଇଛନ୍ତି । ଭାରତ ପାଇଁ ସେ ବର୍ଷ 2010 ଜୁନ 5ରେ ଅନ୍ତର୍ଜାତୀୟ ଡେବ୍ୟୁ କରିଥିଲେ । ହାରାରେରେ ଶ୍ରୀଲଙ୍କା ବିପକ୍ଷରେ ସେ ମାତ୍ର ଗୋଟିଏ ଦିନିକିଆ ମ୍ୟାଚ ଖେଳିଛନ୍ତି । ଏହାର ଗୋଟିଏ ସପ୍ତାହ ପରେ ମେନ ଇନ ବ୍ଲୁ ପାଇଁ ସେ ପ୍ରଥମ ଅନ୍ତର୍ଜାତୀୟ ଟି20 ମ୍ୟାଚ ଖେଳିଥିଲେ । ଭାରତ ପାଇଁ ଓଝା ଦୁଇଟି ଅନ୍ତର୍ଜାତୀୟ ଟି20 ମ୍ୟାଚ ଜିମ୍ବାୱେ ବିପକ୍ଷରେ ଖେଳିଛନ୍ତି । ଏହାପରେ ଭାରତୀୟ ସ୍କ୍ବାଡରୁ ବାଦ ପଡିଥିଲେ ।
ପରେ ଭାରତୀୟ ସୀମିତ ଓଭର ଟିମକୁ ଫେରିପାରିନଥିଲେ ନମନ ଓଝା । ମାତ୍ର 2015ରେ ଟିମ ଇଣ୍ଡିଆର ଶ୍ରୀଲଙ୍କା ଗସ୍ତରେ ଟେଷ୍ଟ ଡେବ୍ୟୁ କରିଥିଲେ । ରିଦ୍ଧିମାନ ଶାହା ଆହତ ହେବା ପରେ ତାଙ୍କ ସ୍ଥାନରେ ଓଝାଙ୍କୁ ସୁଯୋଗ ମିଳିଥିଲା ଓ ଉଭୟ ଇଂନିସରେ ଯଥାକ୍ରମେ 21 ଓ 35 ରନର ଇଂନିସ ଖେଳିଥିଲେ । ଶେହି ମ୍ୟାଚରେ ଭାରତ ବିଜୟୀ ମଧ୍ୟ ହୋଇଥିଲା ।
ତେବେ ସେହି ଏକମାତ୍ର ଟେଷ୍ଟ ମ୍ୟାଚରେ ହିଁ ଭାରତୀୟ ଟେଷ୍ଟ ଜର୍ସିରେ ନଜର ଆସିଥିଲେ ନମନ ।