ଲାଉଡେରହିଲ୍: ଫେଲ ମାରିଲା ମିଶନ ଦିନିକିଆ ବିଶ୍ବକପ । ଏବେ ଟାର୍ଗେଟ 2020ରେ ଟି-20 ବିଶ୍ବକପ । ଏଥିପାଇଁ ବିରାଟ ସେନା ଆଗରେ ପ୍ରଥମ ଚାଲେଞ୍ଜ, କାରବିଆନ କଣ୍ଟା । ପୁଣିଥରେ ପରୀକ୍ଷା ହେବ ବିରାଟ ବାହିନୀର ଦକ୍ଷତା । ଶନିବାରଠାରୁ ୱେଷ୍ଟଇଣ୍ଡିଜ୍ ଗସ୍ତର ପ୍ରଥମ ପରୀକ୍ଷା । ସ୍ଥାନୀୟ ସେଣ୍ଟ୍ରାଲ ବ୍ରୋଡ ରିଜୋନାଲ ପାର୍କ ଟ୍ରୁଫ୍ ଗ୍ରାଉଣ୍ଡରେ ପ୍ରଥମ ଟି-20 ମ୍ୟାଚ । ଭାରତୀୟ ସମୟ 2.30ରେ ଆରମ୍ଭ ହେବ ଲଢେଇ ।
ତେବେ ବିଶ୍ବକପରୁ ଘାଇଲା ହୋଇ ଫେରିଥିବା ଭାରତୀୟ ଦଳର ଏହା ହେବ ପ୍ରଥମ ମ୍ୟାଚ । ସେନାରେ ଅଧିକାଂଶ ନୂଆ ମୁଁହ । ସେପଟେ ସେନାପତି ବିରାଟଙ୍କ ସାଙ୍ଗରେ ନାହାଁନ୍ତି ‘କଟପ୍ପା ଧୋନି’ । ସେହିପରି ପେସ ଷ୍ଟାର ଜସପ୍ରୀତ୍ ବୁମରା ମଧ୍ୟ ବିଶ୍ରାମ ନେଇଛନ୍ତି । ଅଲରାଉଣ୍ଡର ହାର୍ଦ୍ଦିକ୍ ପାଣ୍ଡ୍ୟା ମଧ୍ୟ ଦଳରେ ସାମିଲ ହୋଇ ନାହାଁନ୍ତି । ତେବେ ତାଜା ତାଜା ଆରମ୍ଭ ହୋଇଥିବା ଘରୋଇ କଳି ସହ କ୍ୟାପଟେନ ଓ ଡେପ୍ୟୁଟି ଯୁବ ଦଳକୁ ଧରି ପଡିଆକୁ ଓହ୍ଲାଇବେ । ତେଣୁ ଏହା ଏକ ବଡ ଚାଲେଞ୍ଚ ସଦୃଶ ହେବ ।
ତେବେ ଦିଲ୍ଲୀ କ୍ୟାପିଟାଲ୍ସର କ୍ୟାପଟେନ ଯୁବ ଶ୍ରେୟସ ଆୟର ଓ ମନୀଷ ପାଣ୍ଡେଙ୍କୁ ନିଜର କରାମତି ଦେଖାଇବାକୁ ପଡିବ । ପାଣ୍ଡେ ଶେଷଥର ପାଇଁ ନଭେମ୍ବର, 2018ରେ ଭାରତ ପକ୍ଷରୁ ଖେଳିଥିଲେ । ଏପରି ପକ୍ଷରେ ବ୍ୟାଟିଂ ଲାଇନ ଅର୍ଡର ଦଳୀୟ ଏକାଦଶ ଓ ପନ୍ତଙ୍କ ମଧ୍ୟକ୍ରମରେ ପ୍ରଦର୍ଶନ ଫୋକସରେ ରହିବ ।
ସେହିପରି ସ୍ପିନ ବିଭାଗରେ କୁଳ-ଚା ଯୋଡି ଅନୁପସ୍ଥିତରେ ଦଳକୁ ଟର୍ଣ୍ଣିଂ ପଏଣ୍ଟରେ ଆଗକୁ ନେବେ ୱାଶିଂଟନ୍ ସୁନ୍ଦର । ପେସ୍ ଆଟାକ୍ର ଭାର ଖଲୀଲ ଅହମ୍ମଦ ତଥା ଦୀପକ ଚହରଙ୍କ କାନ୍ଧରେ ରହିବ । ତେବେ ଗବ୍ବର ଫିଟ୍ ହୋଇ ସାରିଥିବାରୁ ରୋହିଚଙ୍କ ସହ ଓପିନଂ କରିବେ । 3ୟ ସ୍ଥାନରେ ଖୋଦ୍ ଅଧିନାୟକ ଓ 4ର୍ଥ ସ୍ଥାନକୁ କେଏଲ ରାହୁଲ ଫେରିବେ । ତିନିବର୍ଷ ପୂର୍ବେ ରାହୁଲ ଏଠାରେ 110 ରନର ଅପରାଜିତ ଶତକୀୟ ଇନିଂସ୍ ଖେଳିଥିଲେ
ଅନ୍ୟପକ୍ଷରେ କାରିବିଆନ ମାଟିରେ ଏହି ଟି-20 ସିରିଜ ଏତେ ସହଜ ହେବନି । କାରଣ ୱେଷ୍ଟଇଣ୍ଡିଜ୍ ଦଳ ବର୍ତ୍ତମାନର ଟି-20 ଡିଫେଣ୍ଡିଂ ଚମ୍ପିଆନ । ଟିମକୁ ବିସ୍ଫୋରକ କାଇରନ୍ ପୋଲାର୍ଡ ଓ ସ୍ପିନର୍ ସୁନୀଲ ନାରିନଙ୍କ ପ୍ରତ୍ୟାବର୍ତ୍ତନ ହୋଇଛି । ତେବେ ଏହି ସିରିଜରୁ କ୍ରିସ୍ ଗେଲଙ୍କୁ ବିଶ୍ରାମ ଦିଆଯାଇଛି । ଆହତ ଆନ୍ଦ୍ରେ ରସେଲଙ୍କ ମଧ୍ୟ ଟି-20 ଟିମରେ ସାମିଲ୍ କରାଯାଇଛି ।
- ଭାରତୀୟ ସମ୍ଭାବ୍ୟ ଏକାଦଶ: ବିରାଟ୍ କୋହଲି (କ୍ୟାପଟେନ୍), ରୋହିତ୍ ଶର୍ମା, ଶିଖର ଧୱନ୍, ଲୋକେଶ ରାହୁଲ୍, ଶ୍ରେୟସ୍ ଆୟର୍, ରିଷଭ ପନ୍ତ, ରବୀନ୍ଦ୍ର ଜାଡେଜା, ୱାଶିଂଟନ୍ ସୁନ୍ଦର, ରାହୁଲ୍ ଚହର୍, ଭୁବନେଶ୍ୱର କୁମାର, ଖଲୀଲ ଅହମ୍ମଦ ।
- ୱେଷ୍ଟଇଣ୍ଡିଜ୍ ଦଳ: ଜନ୍ କ୍ୟାମ୍ପବେଲ୍, ଏଭିନ୍ ଲୁଇସ୍, ଶିମରନ୍ ହେଟମେୟର୍, ନିକୋଲାସ୍ ପୁରନ୍, କାଇରନ୍ ପୋଲାର୍ଡ, ରୋଭମ୍ୟାନ୍ ପୋୱେଲ୍, କାର୍ଲସ୍ ବ୍ରାଥୱେଟ୍ (କ୍ୟାପଟେନ୍), କୀମୋ ପଲ୍, ସୁନୀଲ ନାରିନ୍, ଶେଲଡନ୍ କଟ୍ଟରେଲ୍, ଓଶାନି ଟମାସ, ଆନ୍ଥୋନୀ ବ୍ରାମ୍ବଲ୍, ଆନ୍ଦ୍ରେ ରସେଲ୍, ଖାରୀ ପିଏରୀ।
