ମାଞ୍ଚେଷ୍ଟର: ପ୍ରକାଶ ପାଇଛି ଆଇସିସି ଟେଷ୍ଟ ମାନ୍ୟତା । ସଦ୍ୟ ପ୍ରକାଶିତ ମାନ୍ୟତାରେ ୱେଷ୍ଟଇଣ୍ଡିଜ କ୍ୟାପଟେନ ଜେସନ ହୋଲ୍ଡରଙ୍କୁ ପଛରେ ପକାଇ ପୁଣି ନଂ1ଟେଷ୍ଟ ଅଲରାଉଣ୍ଡର ସ୍ଥାନକୁ ଫେରିଛନ୍ତି ଇଂଲଣ୍ଡ ଅଲରାଉଣ୍ଡର ବେନ ଷ୍ଟୋକ୍ସ । ଅନ୍ୟପଟେ ବ୍ୟାଟିଂ ମାନ୍ୟତା କ୍ୟାରିୟରର ଶ୍ରେଷ୍ଠ 3ୟ ସ୍ଥାନକୁ ଉନ୍ନିତ ହୋଇଛନ୍ତି ଷ୍ଟୋକ୍ସ । ଷ୍ଟିଭ ସ୍ମିଥ 911 ପଏଣ୍ଟ ସହ ପ୍ରଥମ, 886 ପଏଣ୍ଟ ସହ ବିରାଟ କୋହଲି ଦ୍ବିତୀୟଙ୍କ ପରେ ବେନ ଷ୍ଟୋକ୍ସ 827 ପଏଣ୍ଟ ସହ 3ୟ ସ୍ଥାନରେ ରହିଛନ୍ତି । ଅଷ୍ଟ୍ରେଲିଆ ବ୍ୟାଟ୍ସମ୍ୟାନ ମାର୍ନସ ଲବୁସାନ ମଧ୍ୟ ଯୁଗ୍ମଭାବେ 3ୟ ସ୍ଥାନରେ ରହିଛନ୍ତି ।
ୱେଷ୍ଟଇଣ୍ଡିଜ ବିପକ୍ଷ ସିରିଜ ପୂର୍ବରୁ ଆଇସିସି ଟେଷ୍ଟ ଅଲରାଉଣ୍ଡର ମାନ୍ୟତାର ଶୀର୍ଷ ସ୍ଥାନରେ ରହିଥିଲେ ଷ୍ଟୋକ୍ସ । ମାତ୍ର ପ୍ରଥମ ଟେଷ୍ଟରେ ମାନ୍ୟତାର ଦ୍ବିତୀୟ ସ୍ଥାନରେ ଥିବା ଜେସନ ହୋଲ୍ଡରଙ୍କ ଦମଦାର ପ୍ରଦର୍ଶନ ପରେ, ଷ୍ଟୋକ୍ସଙ୍କୁ ଶୀର୍ଷ ସ୍ଥାନ ହରାଇବାକୁ ପଡିଥିଲା । ତେବେ ଦ୍ବିତୀୟ ଟେଷ୍ଟରେ ଉଭୟ ଇଂନିସରେ ଯଥାକ୍ରମେ 176 ଓ 78 ରନର ମ୍ୟାଚ ବିଜୟୀ ଇଂନିସ ପରେ ପୁନର୍ବାର ପ୍ରଥମ ସ୍ଥାନରେ ପହଞ୍ଚିଛନ୍ତି । ଏଥିସହିତ ଦ୍ବିତୀୟ ସ୍ଥାନରେ ଥିବା, ହୋଲ୍ଡରଙ୍କ ଠାରୁ 38 ପଏଣ୍ଟର ଅଗ୍ରଣୀ ମଧ୍ୟ ଲାଭ କରିଛନ୍ତି । ଭାରତୀୟ ଅଲରାଉଣ୍ଡର ରବିନ୍ଦ୍ର ଜାଡେଜା 3ୟ ଓ ରବିଚନ୍ଦ୍ରନ ଅଶ୍ବିନୀ ଅଲରାରାଉଣ୍ଡର ମାନ୍ୟତାର 5ମ ସ୍ଥାନରେ ରହିଛନ୍ତି ।
ଷ୍ଟୋକ୍ସ 18 ମାସ ଧରି ଆଇସିସି ଅଲରାଉଣ୍ଡର ଶୀର୍ଷ ସ୍ଥାନରେ ରହିଛନ୍ତି ଷ୍ଟୋକ୍ସ । ବର୍ଷ 2006ରେ ଆଣ୍ଡ୍ରିୟୁ ଫ୍ଲିଣ୍ଟଫ୍ଙ୍କ ପରେ ଷ୍ଟୋକ୍ସ ପ୍ରଥମ ଖେଳାଳି ଭାବେ ଏହି ସ୍ଥାନରେ ରହିଥିଲେ । ଏପ୍ରିଲ 2008ରେ ଦକ୍ଷିଣ ଆଫ୍ରିକା ଅଲରାଉଣ୍ଡର ଜ୍ୟାକ କାଲିସଙ୍କ 517 ପଏଣ୍ଟ ପରେ, ଷ୍ଟୋକ୍ସ ସର୍ବାଧିକ 497 ପଏଣ୍ଟ ହାସଲ କରିଛନ୍ତି । ଏକ ପ୍ରେସ ବିବୃତିରେ ଅନ୍ତର୍ଜାତୀୟ କ୍ରିକେଟ ପରିଷଦ ପକ୍ଷରୁ ଏନେଇ ସୂଚନା ଦିଆଯାଇଛି ।