ହାଇଦ୍ରାବାଦ: ଅନ୍ତରାଷ୍ଟ୍ରୀୟ କ୍ରିକେଟ ପରିଷଦ(ଆଇସିସି)ର ନୂତନ ଅଧ୍ୟକ୍ଷଙ୍କ ନାମ ଘୋଷଣା ହୋଇ ସାରିଛି । ନ୍ୟୁଜିଲାଣ୍ଡ କ୍ରିକେଟର ମୁଖ୍ୟ ଥିବା ଗ୍ରେଗ ବାର୍କଲେଙ୍କୁ ଆଇସିସିର ନୂତନ ଅଧ୍ୟକ୍ଷ ଭାବେ ବଛା ଯାଇଛି । ପୂର୍ବ ଅଧ୍ୟକ୍ଷ ଶଶାଙ୍କ ମନୋହରଙ୍କ କାର୍ଯ୍ୟକାଳ ଏହିବର୍ଷ ଜୁଲାଇରେ ଶେଷ ହୋଇ ଯାଇଛି, ଯାହାପରେ ଇମରାନ ଖ୍ବାଜାଙ୍କୁ ଅନ୍ତରୀଣ ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଥିଲା ।
ବାର୍କଲେ 2012ରୁ ନ୍ୟୁଜିଲାଣ୍ଡ କ୍ରିକେଟର ନିର୍ଦ୍ଦେଶକ ଭାବେ ରହିଥିଲେ । ସେ 2015ରେ ଆଇସିସି ଡାଇରେକ୍ଟର ମଧ୍ୟ ରହିସାରିଛନ୍ତି ।
ନିଜର ନିଯୁକ୍ତି ନେଇ ଗ୍ରେଗ କହିଛନ୍ତି ଯେ, ‘‘ଅନ୍ତରାଷ୍ଟ୍ରୀୟ କ୍ରିକେଟ ପରିଷଦର ଅଧ୍ୟକ୍ଷ ଭାବେ ନିଯୁକ୍ତ ହେବା ଏକ ଗର୍ବର ବିଷୟ । ମୁଁ ମୋର ସାଥୀ ଆଇସିସି ଡାଇରେକ୍ଟର ମାନଙ୍କୁ ସେମାନଙ୍କ ସମର୍ଥନ ପାଇଁ ଧନ୍ୟବାଦ ଜଣାଉଛି । ମୁଁ ଆଶା କରୁଛି ଯେ ଆମେ ଏକତ୍ରିତ ହୋଇ କ୍ରୀଡାର ନେତୃତ୍ବ ନେବା ଏବଂ ବୈଶ୍ବିକ ମହାମାରୀରୁ ଏକ ଦୃଢ଼ ସ୍ଥିତିରେ ବାହାରି ଅଭିବୃଦ୍ଧି ପାଇଁ ପ୍ରସ୍ତୁତ ହୋଇପାରିବା।’’