ନୂଆଦିଲ୍ଲୀ: ଆଫଗାନିସ୍ତାନ କ୍ରିକେଟର ରାସିଦ ଖାନଙ୍କ ପତ୍ନୀ ଅନୁଷ୍କା ଶର୍ମା ! ଏଭଳି ତଥ୍ୟ ଦେଖାଉଛି ଗୁଗଲ ସର୍ଚ୍ଚ ଇଞ୍ଜିନ। ଗୁଗଲରେ "ରସିଦ ଖାନଙ୍କ ପତ୍ନୀ"ଙ୍କୁ ସର୍ଚ୍ଚ କଲେ ଅନୁଷ୍କା ଶର୍ମାଙ୍କୁ ଦେଖାଉଛି। ଖାଲି ସେତିକି ନୁହେଁ ରସିଦ ଖାନଙ୍କ ନିଜସ୍ବ ତଥ୍ୟରେ ବିବାହିତ ଦେଖାଉଛି ଗୁଗଲ। ଏହାସହ ବିରାଟ କୋହଲିଙ୍କ ସହ ହୋଇଥିବା ବିବାହ ତାରିଖ ରସିଦଙ୍କ ତଥ୍ୟରେ ଦେଖାଉଛି ଗୁଗୁଲ।
ଗୁଗଲର ଏଭଳି ତ୍ରୁଟି ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏନେଇ ଅନୁଷ୍କା ଶର୍ମା କିମ୍ବା ବିରାଟ କୋହଲି କୌଣସି ପ୍ରତିକ୍ରିୟା ରଖିନାହାନ୍ତି। ତେବେ ଏହା କାହିଁକି ଗୁଗଲ ଏଭଳି ଏକ ଭୁଲ ତଥ୍ୟ ଦେଖାଇଛି ସ୍ପଷ୍ଟ ହୋଇନାହିଁ ।
2018 ମସିହାରେ ସୋସିଆଲ ମିଡିଆରେ ନିଜ ପ୍ରଶଂସକ ରସିଦ ଖାନ କଥା ହୋଇଥିଲେ। ଏହି ସମୟରେ ତାଙ୍କର ଜଣେ ଫ୍ୟାନ ତାଙ୍କୁ କେଉଁ ବଲିଉଡ ଅଭିନେତ୍ରୀ ଭଲ ଲାଗେ ବୋଲି ପ୍ରଶ୍ନ ପଚାରିଥିଲେ। ଏହି ସମୟରେ ସେ ଅନୁଷ୍କା ଶର୍ମା ଓ ପ୍ରୀତି ଜିଣ୍ଟା ତାଙ୍କର ପ୍ରିୟ ବଲିଉଡ ଅଭିନେତ୍ରୀ ବୋଲି କହିଥିଲେ। ସେହି ସମୟରେ ରସିଦଙ୍କ ଏହି ବୟାନ ସୋସିଆଲ ମିଡିଆରେ ଭାଇରାଲ ହୋଇଥିଲା। ସେବେଠାରୁ ଗୁଗଲ ଏଭଳି ଭୁଲ ତଥ୍ୟ ଦେଖାଉଥିବା ସୂଚନା ମିଳିଛି । ତେବେ ରାସିଦ ଖାନ ଏପର୍ଯ୍ୟନ୍ତ ବିବାହ କରିନାହାନ୍ତି।
ଅନୁଷ୍କା ଶର୍ମା ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲିଙ୍କୁ ବିବାହ କରିଛନ୍ତି । 11 ଡିସେମ୍ବର 2017 ମସିହାରେ ଦୁହେଁ ଇଟାଲୀରେ ବିବାହ ବନ୍ଧନରେ ବାନ୍ଧି ହୋଇଥିଲେ। ଗତ ଅଗଷ୍ଟ ମାସରେ ଅନୁଷ୍କା ଗର୍ଭବତୀ ଥିବା ନେଇ ସୋସିଆଲ ମିଡିଆରେ ଜଣାଇଥିଲେ। ଏହାପରେ ଉଭୟ ବିରାଟ କୋହଲି ଓ ଅନୁଷ୍କା ଶର୍ମାଙ୍କ ନିକଟରୁ ଶୁଭେଚ୍ଛାର ସୁଅ ଛୁଟିଥିଲା।
ବ୍ୟୁରୋ ରିପୋର୍ଟ, ଇଟିଭି ଭାରତ
