ଜୋହାନ୍ସବର୍ଗ: ପୂର୍ବତନ ଦକ୍ଷିଣ ଆଫ୍ରିକୀୟ ଫାଷ୍ଟ ବୋଲର ଭର୍ଣ୍ଣନ ଫିଲାଣ୍ଡରଙ୍କ ସାନ ଭାଇଙ୍କୁ ହତ୍ୟା । କେହି ଦୁର୍ବୃତ୍ତ ଫିଲାଣ୍ଡରଙ୍କ 32 ବର୍ଷୀୟ ସାନ ଭାଇ ଟେରୋନ ଫିଲାଣ୍ଡରଙ୍କୁ କେପଟାଉନସ୍ଥିତ ଘର ନିକଟରେ ଗୁଳି କରିଥିବା ଜଣାପଡିଛି ।
ସୂଚନା ଅନୁଯାୟୀ, ବୁଧବାର ଅପରାହ୍ନରେ ଜଣେ ପଡୋଶୀଙ୍କୁ ପାଣି ଦେଉଥିବା ସମୟରେ ଏହି ଘଟଣା ଘଟିଥିଲା । ହତ୍ୟା ମାମଲା ରୁଜୁ କରି ପୋଲିସ ତଦନ୍ତ କରୁଥିବାବେଳେ, ହତ୍ୟାକାରୀ ଏପର୍ଯ୍ୟନ୍ତ ଧରାପଡିନାହିଁ ।
ଭର୍ଣ୍ଣନ ଚଳିତ ବର୍ଷ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି । ଟ୍ବିଟ ଯୋଗେଁ ଏହି ହତ୍ୟାକାଣ୍ଡ ନେଇ ସୂଚନା ଦେବା ସହ, ଫିଲାଣ୍ଡର ଏଭଳି କଠିନ ସମୟରେ ପରିବାରର ଗୋପନୀୟତାକୁ ସମ୍ମାନ ଜଣାଇବାକୁ ସେ ନିବେଦନ କରିଛନ୍ତି । ଏଥିସହିତ ଭାଇଙ୍କ ଆତ୍ମାର ସଦଗତି କାମନା କରିଛନ୍ତି ।
ଫିଲାଣ୍ଡର ଇଂଲଣ୍ଡ ବିପକ୍ଷ ସିରିଜ ପରେ ଅନ୍ତର୍ଜାତୀୟ କ୍ରିକେଟରୁ ଅଲବିଦା କହିଥିଲେ । ସେ 64ଟି ଅନ୍ତର୍ଜାତୀୟ ଟେଷ୍ଟ ମ୍ୟାଚରୁ 224 ୱିକେଟ, 30ଟି ଦିନିକିଆ ମ୍ୟାଚରୁ 41 ୱିକେଟ ଓ 7ଟି ଟି-20ରୁ 4 ୱିକେଟ ହାସଲ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ