ମୁମ୍ବାଇ: ଆଇସିସି ମାନ୍ୟତାର ନମ୍ବର ୱାନ ବୋଲର ଜସପ୍ରୀତ ବୁମରା ଓ ତାଙ୍କ ମା’ ଦଲଜିତ ସୋସିଆଲ ମିଡିଆରେ ବଖାଣିଛନ୍ତି ପ୍ରାରମ୍ଭିକ ଦିନର ସଂଘର୍ଷ କାହାଣୀ । ଯାହାକୁ ନିଜ ଅଫିସିଆଲ ଟ୍ବିଟର ଆକାଉଣ୍ଟରେ ସେୟାର କରିଛି ମୁମ୍ବାଇ ଇଣ୍ଡିଆନ୍ସ ।
‘ଦକ୍ଷତା ଓ ପାରଦର୍ଶିତା ଯେକୌଣସିଟି ଆପଣଙ୍କୁ ସଫଳତାର ଶୀର୍ଷରେ ପହଁଞ୍ଚିପାରେ । ମୁଁ ଜଣେ ଏପରି ଯୁବ ଖେଳାଳିଙ୍କ କଥା କହିବି ଯାହାକୁ ମୁମ୍ବାଇ ଇଣ୍ଡିଆନ୍ସ କରିଥିଲା ଆବିଷ୍କାର ।’ ଲଣ୍ଡନରେ ଆୟୋଜିତ ସ୍ପୋର୍ଟସ ବିଜନେସ ସମ୍ମିଳନୀରେ ମୁମ୍ବାଇ ଇଣ୍ଡିଆନ୍ସର ମାଲିକାଣୀ ନିତା ଅମ୍ବାନୀ ଏପରି କିଛି କହିଥିଲେ ଓ ଭିଡିଓରେ ଦେଖାଇଥିଲେ ବୁମରାଙ୍କ ସଫଳତାର କାହାଣୀ । ବୁମରାଙ୍କ ମା ଦଲଜିତ କହିଥିଲେ ଯେ, ଯେତେବେଳେ ଜସପ୍ରୀତ ମାତ୍ର 5 ବର୍ଷର ହୋଇଥିଲେ ତାଙ୍କ ବାପାଙ୍କ ମୃତ୍ୟୁ ହୋଇଥିଲା ।
‘ସେତେବେଳେ ଆମେ କୌଣସି ଜିନିଷ କିଣିବା ପାଇଁ ସମର୍ଥ ନଥିଲୁ । ମୋ ପାଖରେ ଗୋଟିଏ ହଳ ଜୋତା, ଆଉ ଗୋଟିଏ ଯୋଡା ଟି-ସାର୍ଟ ଥିଲା । ଯାହାକୁ ପ୍ରତିଦିନ ସଫା କରି ମୁଁ ବାରମ୍ବାର ବ୍ୟବହାର କରୁଥିଲି’ ବୋଲି କହିଛନ୍ତି ବୁମରା । ବୁମରା ଆଗକୁ କହିଛନ୍ତି, ‘ଜଣେ ଶିଶୁ ଭାବେ ଆପଣ କାହାଣୀ ଶୁଣନ୍ତି ଯେ ବେଳେ ବେଳେ ଏମିତି ହୁଏ କିଛି ଲୋକ ଆସନ୍ତି ଆପଣଙ୍କୁ ଦେଖନ୍ତି ଓ ଆପଣଙ୍କୁ ଏହିପରି ବାଛି ନିଅନ୍ତି । କିନ୍ତୁ ମୋ କ୍ଷେତ୍ରରେ ଏହି କାହାଣୀ ସତ୍ୟ ହୋଇଛି ।’
ପ୍ରଥମଥର ବୁମରାଙ୍କୁ ଆଇପିଏଲରେ ଖେଳିବା ଦେଖି ଲୁହ ଅଟକାଇ ପାରିନଥିଲେ ବୋଲି କହିଥିଲେ ଦଲଜିତ । ଜସପ୍ରୀତ ମତେ ଆର୍ଥିକ ଓ ଶାରିରୀକ ଭାବେ ସଂଘର୍ଷ କରିଥିବା ଦେଖିଛି ।ଜଣେ ଛୋଟପିଲା ଭାବେ ଯେଉଁ ସଂଘର୍ଷ ମୁଁ ଦେଖିଛି ତାହା ମତେ ଅନେକ ଶକ୍ତି ଦେଇଛି ବୋଲି କହିଛନ୍ତି ବୁମରା ।
