କଟକ: ଓସିଏର ପିଛା ଛାଡ଼ୁନି ବୟସ ଜାଲିଆତି କଳଙ୍କ । ପୁଣି କିଛି ମାସ ବ୍ୟବଧାନରେ ସାମ୍ନା ଆସିଛି ଏଭଳି ଖବର । ତେବେ ଏଥର ଓଡିଶା କ୍ରିକେଟ ଆସୋସିଏନକୁ ଲାଗିଛି ଡବଲ ଝଟକା । 2 ଉଦୀୟମାନ ଯୁବ କ୍ରିକେଟର ରାଜେଶ ମହାନ୍ତି ଓ କ୍ରିଷ୍ଣ ପଲେଇଙ୍କୁ 2 ବର୍ଷ ଲେଖାଏଁ ବାସନ୍ଦାଦେଶ ଶୁଣାଇଛି ବିସିସିଆଇ ।
ଭିଡିଓ ସୌଜନ୍ୟ: ସମ୍ବାଦଦାତା କଟକ ଓସିଏର ଖାଲଖିଆଲ ମନୋଭାବ ଯୋଗୁଁ କ୍ୟାରିୟର ଆରମ୍ଭରୁ 2 କ୍ରିକେଟରଙ୍କୁ କ୍ରିକେଟରୁ ଅଲଗା ହେବକୁ ପଡିଛି । ବିସିସିଆଇକୁ ଖେଳାଳିଙ୍କ ବୟସଗତ ପ୍ରମାଣପତ୍ର ପଠାଇବା ପୂର୍ବରୁ ଠିକ ଭାବରେ ତଦାରଖ କରାଯାଇନଥିବା ଚର୍ଚ୍ଚା ହେଉଛି । ଏହାପୂର୍ବରୁ ଓଡିଶାର ଉଭୟ ପୁରୁଷ ଓ ମହିଳା ବର୍ଗରେ 15 ରୁ ଊର୍ଦ୍ଧ୍ଵ ଖେଳାଳି ବାସନ୍ଦାଦେଶ ଭୋଗିଛନ୍ତି । ଯଦି ଏହି ଅବସ୍ଥା ଦେଇ ଓସିଏ ଗତ କରେ ତେବେ ଆଗାମୀ ଭବିଷ୍ୟ ଅନ୍ଧକାର ହେବା ସ୍ପଷ୍ଟ ।
ନୂଆ ବିସିସିଆଇ ଟିମ କୌଣସି ପ୍ରକାର ମନମାନି କୁ ସହଜରେ ଗ୍ରହଣ କରିବ ନାହିଁ । କାରଣ ବିସିସିଆଇର ନୂଆ ବସ ଗାଙ୍ଗୁଲି କ୍ରିକେଟକୁ ତୃଣମୂଳ ସ୍ତରରୁ ବିକାଶ କରିବାର ଲକ୍ଷ୍ୟ ନେଇଛନ୍ତି । ଓସିଏର କର୍ମକର୍ତ୍ତାଙ୍କୁ ମଧ୍ୟ ଦଣ୍ଡ ବିଧାନ କରିବା ମଧ୍ୟ ଆବଶ୍ୟକ ବୋଲି କହିଛନ୍ତି କ୍ରୀଡାବିତ ପବନ ଅଗ୍ରୱାଲ । ଏଥିସହିତ ଓଡିଶା କ୍ରିକେଟ ବାସନ୍ଦ ହୋଇଥିବା ଦୁଇ ଖେଳାଳିଙ୍କ ଅନୁପସ୍ଥିତିରେ, ଆଗାମୀ ମ୍ୟାଚରେ ଅସୁବିଧାର ସାମ୍ନା କରିବ ବୋଲି କହିଛନ୍ତି କ୍ରୀଡ଼ାବିତ ।
ତେବେ ଭୁଲ ଜନ୍ମଗତ ପ୍ରମାଣପତ୍ର ଦାଖଲ କରି ଖେଳାଳି ଦଣ୍ଡିତ ହୋଇଥିବାବେଳେ ଓସିଏ କାହିଁକି ନହେବ ତାକୁ ନେଇ ପ୍ରଶ୍ନ ଉଠିଛି । ଅନ୍ୟପଟେ ସୌରଭ ଗାଙ୍ଗୁଲିଙ୍କ ସଭାପତିତ୍ବରେ ବର୍ତ୍ତମାନର ବିସିସିଆଇର ନୂଆ ପ୍ରଶାସକ ଭାରତୀୟ କ୍ରିକେଟକୁ ସ୍ବଚ୍ଛ ଓ ଦୁର୍ନୀତି ମୁକ୍ତ କରିବାରେ ଏହି ନିଷ୍ପତ୍ତି ଯଥାର୍ଥ ବୋଲି କ୍ରୀଡାବିତ ମତ ଦେଇଛନ୍ତି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
