ମେଲବୋର୍ଣ୍ଣ: ବକ୍ସିଂ ଡେ ଟେଷ୍ଟରେ ଐତିହାସିକ ବିଜୟ ଦ୍ବାରଦେଶରେ ଭାରତୀୟ ଦଳ । ଅଜିଙ୍କ୍ୟ ରାହାଣେଙ୍କ ନେତୃତ୍ବରେ ମ୍ୟାଚର ପ୍ରଥମ ଦିନରୁ ଚମତ୍କାର ପ୍ରଦର୍ଶନ ସହ ଘରୋଇ ଅଷ୍ଟ୍ରେଲିଆ ଉପରେ ପ୍ରଭାବ ବିସ୍ତାର କରିଛି ଭାରତ । ପ୍ରଥମ ଇଂନିସର ଉପଯୋଗୀ ଅଗ୍ରଣୀ ଓ ବୋଲରଙ୍କ ଘାତକ ବୋଲିଂ ବଳରେ ବିଜୟମୁହାଁ ହୋଇଛି ଭ୍ରମଣକାରୀ ଦଳ । 3ୟ ଦିନର ଖେଳ ଶେଷ ସୁଦ୍ଧା ମେଲବୋର୍ଣ୍ଣ ଟେଷ୍ଟ ଭାରତ କବ୍ଜାରେ ରହିଛି ।
ପ୍ରଥମ ଇଂନିସ ପରି ଅଷ୍ଟ୍ରେଲିଆର ଦ୍ବିତୀୟ ଇଂନିସକୁ ମଧ୍ୟ ଶ୍ରୀଘ୍ର ଶେଷ କରିବା ଦିଗରେ ଭାରତୀୟ ବୋଲରଙ୍କ ରଣନୀତି ସଫଳ ହୋଇଛି । ଷ୍ଟମ୍ପ ଅପସାରଣ ସୁଦ୍ଧା ଅଷ୍ଟ୍ରେଲିଆର ସ୍କୋର 133/6 ରହିଛି । ଫଳରେ ଘରୋଇ ଦଳ ପାଖରେ ଶେଷ 4ଟି ୱିକେଟ ଥିବାବେଳେ ମାତ୍ର 2 ରନରେ ଆଗୁଆ ରହିଛି । ଅଲରାଉଣ୍ଡର କେମରନ ଗ୍ରୀନ 17 ଓ ପାଟ କମିନ୍ସ 15 ରନରେ ଅପରାଜିତ ଅଛନ୍ତି ।
ଅଷ୍ଟ୍ରେଲିଆ ପକ୍ଷରୁ ୱିକେଟକିପର ବ୍ୟାଟ୍ସମ୍ୟାନ ମାତ୍ୟୁ ୱେଡ ସର୍ବାଧିକ 40 ରନର ଇଂନିସ ଖେଳିଛନ୍ତି । ମାର୍ନସ ଲବୁସାନ 28 ଓ ଟ୍ରାଭିସ ହେଡ 17 ରନ କରିଛନ୍ତି । ଷ୍ଟିଭ ସ୍ମିଥ, ଜୋ ବର୍ଣ୍ଣସ, କଙ୍ଗାରୁ କ୍ୟାପଟେନ ଟିମ ପେନ ଦୁଇଅଙ୍କ ସ୍ପର୍ଶ କରିପାରି ନାହାଁନ୍ତି । ଏପରିକି ଆଇସିସି ଟେଷ୍ଟ ମାନ୍ୟତାର ଶୀର୍ଷରେ ଥିବା ସ୍ମିଥ ଚଳିତରେ ସିରିଜରେ ସର୍ବାଧିକ ସ୍କୋର ରହିଛି 8 । ଏହା ବୟାନ କରୁଛି ଭାରତୀୟ ବୋଲରଙ୍କ ଜବରଦସ୍ତ ପ୍ରଦର୍ଶନ ।