ହାଇଦ୍ରାବାଦ: ମହାମାରୀ କୋରୋନାରେ ଦେଶରେ ହାହାକାର ସ୍ଥିତି । ଜନସଂଖ୍ୟା ବହୁଳ ଭୁଖଣ୍ଡକୁ କବଳିତ କରିଛି ଅଦୃଶ୍ୟ ଭାଇରସ । ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢିଚାଲିଥିବାବେଳେ, ମୃତ୍ୟୁ ସଂଖ୍ୟା ମଧ୍ୟ ତାଳଦେଇ ବୃଦ୍ଧିପାଇବାରେ ଲାଗିଛି । ଦିଲ୍ଲୀ ସମେତ ଦେଶର ପ୍ରମୁଖ ସହରରେ ଆକ୍ରାନ୍ତ ରୋଗୀଟିଏ ପାଇଁ ଡାକ୍ତରଖାନାରେ ଶଯ୍ୟାଟିଏ ପାଇବାକୁ ପ୍ରତିଯୋଗିତା କରିଚାଲିଛି । ଏକାଧିକ ହୃଦୟବିଦାରକ ଦୃଶ୍ୟ ସାମ୍ନାକୁ ଆସିବା ପରେ ସଭିଏଁ ଚିନ୍ତିତ ।
ଅକ୍ସିଜେନର ଅଭାବ ଅଣନିଶ୍ବାସୀ ନୀରିହ ମଣିଷଙ୍କ ସଂଖ୍ୟା ବଢାଉଛି । ତେବେ ଦେଶର ଏପରି ସ୍ଥିତିରେ ମର୍ମାହତ ହୋଇଛନ୍ତି କ୍ରିକେଟର ରବିଚନ୍ଦ୍ରନ ଅଶ୍ବିନ ।
ଏକାଧିକ ଟ୍ବିଟ ଜରିଆରେ ନିଜର ଭାବାବେଗ ପରିପ୍ରକାଶ କରିବା ସହ ସମର୍ଥ ଅନୁଯାୟୀ ସାହାଯ୍ୟ କରିବେ ବୋଲି କଥା ଦେଇଛନ୍ତି ଅଶ୍ବିନ । ନିଜେ ସ୍ବାସ୍ଥ୍ୟ ବିଭାଗର କୌଣସି କର୍ମଚାରୀ ହୋଇନଥିଲେ ମଧ୍ୟ ତାଙ୍କ ଦ୍ବାରା ଯାହା ସମ୍ଭବ ନିଶ୍ଚୟ କରିବେ ବୋଲି ଦୃଢୋକ୍ତି କରିଛନ୍ତି ଷ୍ଟାର ଭାରତୀୟ ସ୍ପିନର । ଅଶ୍ବିନଙ୍କ ଏହି ଅପିଲ ପରେ, ଦେଶର ବିଭିନ୍ନ ପ୍ରାନ୍ତରୁ ଅସୁବିଧାରେ ଥିବା ଲୋକେ ଯୋଗାଯୋଗ କରିଛନ୍ତି ।
ଅନ୍ୟପଟେ ଅନ୍ୟତମ ଷ୍ଟାର ଭାରତୀୟ ସ୍ପିନର ହରଭଜନ ସିଂହ, ପୁନେରେ କୋଭିଡ-19 ଟେଷ୍ଟ ପାଇଁ ଏକ ମୋବାଇଲ ଲାବୋରୋଟରୀ ସେବା ଆରମ୍ଭ କରିଛନ୍ତି । ଏହି ଲାବୋରୋଟରୀରେ ଶନିବାର ଠାରୁ ସେବା ଆରମ୍ଭ ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ