ଲଣ୍ଡନ:ଇଂଲଣ୍ଡ ଅଲରାଉଣ୍ଡର ମୋଇନ ଅଲୀ ସୋମବାର କ୍ରିକେଟର ଲମ୍ବା ଫର୍ମାଟରୁ ସନ୍ୟାସ ଘୋଷଣା କରିଛନ୍ତି । ୩୪ ବର୍ଷୀୟ ଅଲୀ ବର୍ଷ ୨୦୧୪ରେ ଟେଷ୍ଟ ଡେବ୍ୟୁ କରିଥିଲେ । ଇଂଲଣ୍ଡ ପକ୍ଷରୁ ୬୪ଟି ଟେଷ୍ଟ ମ୍ୟାଚ୍ରେ ସେ ପ୍ରତିନିଧିତ୍ବ କରିଛନ୍ତି । ୫ ଥର ୫ ୱିକେଟ ହାସଲ କରିବା ସହିତ ମୋଟ ୧୯୫ଟି ଟେଷ୍ଟ ୱିକେଟ ତାଙ୍କ ନାମରେ ରହିଛି । ଟେଷ୍ଟ କ୍ୟାରିୟରରେ ୫ଟି ଶତକୀୟ ଇଂନିସ ସହିତ ୨୮.୨୯ ଆଭରେଜରେ ୨,୯୧୪ ରନ୍ ମଧ୍ୟ ସଂଗ୍ରହ କରିଛନ୍ତି ।
ସୋମବାର ନିଜ ଅବସରକାଳୀନବାର୍ତ୍ତାରେ ଅଲୀ କହିଛନ୍ତି, "ଯଥାସମ୍ଭବ ଅଧିକ କ୍ରିକେଟ ଖେଳିବାକୁ ଇଚ୍ଛା ରହିଛି । ଟେଷ୍ଟ କ୍ରିକେଟର ଅନୁଭୂତି ନିଆରା । ବିଶ୍ବର ଶ୍ରେଷ୍ଠ ଟିମସହ ଏହି ଫର୍ମାଟରେ ଖେଳିବା ସମୟରେ ଖାସ୍ ଅନୁଭବ ହୋଇଛି । ତେବେ ୩୪ ବର୍ଷର ହୋଇଯାଇଥିବାରୁ ଅବସର ଘୋଷଣା କରିବାର ଏହା ପ୍ରକୃଷ୍ଟ ସମୟ ବୋଲି ଅନୁଭବ କରୁଛି ।"