ଓଟାୱା: ଇତିହାସ ରଚିଲା କାନାଡା କ୍ରିକେଟ ଟିମ ।ଆଇସିସି ପୁରୁଷ ଟି20 ବିଶ୍ବକପ 2024 ଟିକେଟ ହାତେଇଲା କାନାଡା । ବରମୁଡାକୁ 39 ରନରେ ହରାଇ ଟି20 ବିଶ୍ବକପ ଖେଳିବା ପାଇଁ ଯୋଗ୍ୟତା ଅର୍ଜନ କରିଛି କାନାଡା । ଆମେରିକା ଓ ୱେଷ୍ଟଇଣ୍ଡିଜ ଆୟୋଜକ ଦେଶ କାରଣରୁ ପୂର୍ବରୁ ଯୋଗ୍ୟତା ହାସଲ କରି ସାରିଥିଲେ । ଇତିହାସରେ ପ୍ରଥମ ଥର ପାଇଁ 2024ରେ ହେବାକୁ ଥିବା ଟି20 ବିଶ୍ବକପରେ ଖେଳିବାକୁ କାନାଡା ଯୋଗ୍ୟତା ହାସଲ କରିଛି । ଧମାକାଦାର ଏଣ୍ଟ୍ରି କରିଛି ଏହି ଦଳ ।
ଆସନ୍ତାବର୍ଷ ଅର୍ଥାତ 2024ରେ ଆଇସିସି ପୁରୁଷ ଟି20 ବିଶ୍ବକପ ଅନୁଷ୍ଠିତ ହେବ । ଏଥିରେ କାନାଡା କ୍ରିକେଟ ଦଳ ମହାନ ମହାନ କ୍ରିକେଟ ଦଳ ବିପକ୍ଷରେ ମୁକାବିଲା କରିବ । ହାମିଲଟନରେ ଖେଳାଯାଇଥିବା ଏକ ମ୍ୟାଚରେ ବରମୁଡାକୁ 39 ରନରେ ହରାଇ ଟି20 ବିଶ୍ବକପ ଖେଳିବା ପାଇଁ ଯୋଗ୍ୟତା ଅର୍ଜନ କରିଛି କାନାଡା ।
କାନାଡା ବନାମ ବରମୁଡା ମ୍ୟାଚ ଫଳାଫଳ: ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା କାନାଡା । ଦଳର ନବନୀତ ଧାଲିବାଲ 38 ବଲରେ 45 ରନ କରିଥିଲେ । 4 ୱିକେଟ ହରାଇ ଦଳ 132 ରନ କରିଥିଲା । ବରମୁଡାରେ ନିଖିଲ ଦତ୍ତା କାନାଡାର କମାଉ ଲିବରାକ (23) ଓ ଡଲର ରାଲିସ୍ (1) ମହତ୍ତ୍ବପୂର୍ଣ୍ଣ ୱିକେଟ ନେଇଥିଲେ । କାନାଡା ଦେଇଥିବା ବିଜୟ ଲକ୍ଷ୍ୟ ପିଛା କରି ବରମୁଡା ଟିମ ଭଳ ଆରମ୍ଭ କରିଥିଲା । ଦଳୀୟ ସ୍କୋର 52ରେ କୌଣସି ୱିକେଟ ପତନ ହୋଇନଥିଲା । ମାତ୍ର ଏହାପରେ ଦଳ ଉପରେ ସଙ୍କଟ ପଡିଥିଲା । ଗୋଟିଏ ପରେ ଗୋଟିଏ ୱିକେଟ ପତନ ହୋଇଥିଲା । 93 ରନ କରି ଦଳ ଅଲଆଉଟ ହୋଇଥିଲେ ।