କୋଲକାତା: ନଭେମ୍ବର ୫ରେ ନିଜର ୩୫ତମ ଜନ୍ମଦିନକୁ ବେଶ ସ୍ମରଣୀୟ କରିଛନ୍ତି ଭାରତୀୟ ଷ୍ଟାର ବ୍ୟାଟର ବିରାଟ କୋହଲି । ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ୪୯ତମ ଦିନିକିଆ ଶତକ ହାସଲ କରି ସେ ନିଜ ଆଦର୍ଶ ସଚିନ ତେନ୍ଦୁଲକରଙ୍କ ସମକକ୍ଷ ହୋଇଛନ୍ତି । ଜନ୍ମଦିନରେ ଏହି କୀର୍ତ୍ତିମାନ ହାସଲ କରିଥିବାରୁ ଏହା ବିରାଟଙ୍କ ପାଇଁ ଚିର ସ୍ମରଣୀୟ ହୋଇ ରହିବ । ତେବେ ଏହି ଐତିହାସିକ ଦିନକୁ ଆହୁରି ସ୍ମରଣୀୟ କରିବା ପାଇଁ ଭରପୁର ଚେଷ୍ଟା କରିଥିଲା ବେଙ୍ଗଲ କ୍ରିକେଟ ଆସୋସିଏସନ୍ (CAB) । ମ୍ୟାଚ୍ ବିଜୟୀ ଐତିହାସିକ ଶତକ ପରେ କୋହଲିଙ୍କୁ ସୁନାରେ ତିଆରି ଏକ ବ୍ୟାଟ୍ ଉପହାର ଦେଇଥିଲେ CAB ଅଧ୍ୟକ୍ଷ ସ୍ନେହାଶିଷ ଗାଙ୍ଗୁଲି ।
କ୍ରିକେଟ ଜଗତର ବାଦଶାହ ବିରାଟ କୋହଲିଙ୍କ ଜନ୍ମଦିନରେ କୋଲକାତାର ଇଡେନ୍ ଗାର୍ଡେନ୍ସରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ମ୍ୟାଚ୍ ଥିବାରୁ ଏହାକୁ ଧୂମଧାମରେ ପାଳନ କରିବା ନେଇ ବେଙ୍ଗଲ କ୍ରିକେଟ ଆସୋସିଏସନ୍ (CAB) ପକ୍ଷରୁ ବିଶେଷ ପ୍ରସ୍ତୁତି କରାଯାଇଥିଲା । ହେଲେ ଏଥିରୁ କିଛି କାର୍ଯ୍ୟକ୍ରମକୁ ଶେଷ ମୁହୂର୍ତ୍ତରେ ବାଦ ଦିଆଯାଇଥିଲା । କାରଣ ଆତସବାଜି ଏବଂ ୭୦,୦୦୦ ଦର୍ଶକଙ୍କୁ କୋହଲିଙ୍କ ମାସ୍କ ବଣ୍ଟନ ପାଇଁ ପ୍ରଶାସନିକ ଅନୁମତି ମିଳିନଥିଲା । କିନ୍ତୁ କୋହଲିଙ୍କ ୩୫ତମ ଜନ୍ମଦିନକୁ ସ୍ମରଣୀୟ କରିବା ପାଇଁ CAB ଆଉ ଏକ ଯୋଜନା କରିଥିଲା । ଉପହାର ସ୍ବରୂପ ତାଙ୍କୁ ଏକ ସୁନାର ବ୍ୟାଟ୍ ପ୍ରଦାନ କରାଯାଇଥିଲା । ମ୍ୟାଚ୍ ଶେଷ ହେବା ପରେ CAB ଅଧ୍ୟକ୍ଷ ସ୍ନେହାଶିଷ ଗାଙ୍ଗୁଲି କୋହଲିଙ୍କୁ ୨୬ ଲକ୍ଷ ଟଙ୍କାରେ ପ୍ରସ୍ତୁତ ଏହି ଉପହାର ପ୍ରଦାନ କରିଥିଲେ ।