କଟକ:ବାରବାଟୀ ଷ୍ଟାଡିୟମରେ ଆସନ୍ତାକାଲିଠାରୁ(ସୋମବାର) ଖେଳାଯିବ ଲିଜେଣ୍ଡ୍ସ ଲିଗ କ୍ରିକେଟ ମ୍ୟାଚ୍ ( Legends League Cricket ) । ଏନେଇ ବାରବାଟୀରେ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ଗ୍ୟାଲେରୀ, ଲାଇଟ, ପ୍ରେସ ବକ୍ସ, କ୍ଳବ ହାଉସ ସବୁ ଦିଗରେ ଷ୍ଟାଡିୟମ ସମ୍ପୂର୍ଣ୍ଣ ରୂପେ ପ୍ରସ୍ତୁତ ରହିଛି । ମ୍ୟାଚର ସୁରକ୍ଷା ଦିଗକୁ ଦୃଷ୍ଟିର ରଖି କଟକ କମିଶନରେଟ ପୋଲିସ ପକ୍ଷରୁ ୪୦ ସେକ୍ସନ ପୋଲିସ ଫର୍ସ ମୁତୟନ କରାଯାଇଛି । ସେପ୍ଟେମ୍ବର ୨୬, ୨୭, ୨୯ ତିନି ଦିନ ଧରି ଖେଳାଯିବ ଏହି ମ୍ୟାଚ୍ । ପ୍ରଥମ ମୁକାବିଲା ମଣିପାଲ ଟାଇଗର୍ସ ବନାମ ଭିଲୱାରା କିଙ୍ଗସ ମଧ୍ୟରେ ଖେଳାଯିବ ।
ତିନିଦିନ ଧରି ହେବକୁ ଥିବା ଏହି ଟୁର୍ଣ୍ଣାମେଣ୍ଟ ପାଇଁ କଟକ କମିଶନରେଟ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି । ଲିଜେଣ୍ଡ୍ସ ଲିଗ ଖେଳାଯିବା ନେଇ ଓସିଏ ଏବଂ ଲିଜେଣ୍ଡ୍ସ ଲିଗ ଆୟୋଜକ ସହିତ କମିଶନରେଟ ପୋଲିସର ବୈଠକ ବସିଥିଲା । ଲିଜେଣ୍ଡ୍ସ ଲିଗ ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି କଟକ କମିଶନରେଟ ପୋଲିସ । ଖେଳାଳିଙ୍କ ଷ୍ଟାଡିୟମ ଆସିବାଠୁ ଆରମ୍ଭ କରି ଖେଳ ପରିଚାଳନା ଏବଂ ଯିବା ପର୍ଯ୍ୟନ୍ତ ସବୁ ଦିଗରେ ନଜର ରଖିବ ପୋଲିସ । ମୋଟ 40 ସେକସନ ଫୋର୍ସ ଏହି ମ୍ୟାଚର ସୁରକ୍ଷା ଦିଗରେ ମୁତୟନ ରହିବେ ।