ନୂଆଦିଲ୍ଲୀ: ଆଉ ନାହାନ୍ତି ପୂର୍ବତନ ଅଷ୍ଟ୍ରେଲୀୟ ଅଲରାଉଣ୍ଡର ଆଣ୍ଡ୍ରିୟୁ ସାଇମଣ୍ଡ୍ସ । 46 ବର୍ଷ ବୟସରେ ଅଷ୍ଟ୍ରେଲିଆରେ ଏକ କାର୍ ଦୁର୍ଘଟଣାରେ ତାଙ୍କର ଦେହାନ୍ତ ହୋଇଛି । ଏହି ଖବର ଜଣାପଡିବା ପରେ କ୍ରିକେଟ ଜଗତ ସ୍ତବ୍ଦ ହୋଇଯାଇଛି । ସାଇମଣ୍ଡ୍ସ ଆକସ୍ମିକ ବିୟୋଗରେ ବିଶ୍ବର ଅନେକ କ୍ରିକେଟ କିମ୍ବଦନ୍ତୀ ଶୋକବ୍ୟକ୍ତ କରିଛନ୍ତି । ଅନ୍ତର୍ଜାତୀୟ କ୍ରିକେଟ ପରିଷଦ(ICC) ମଧ୍ୟ ବିଶ୍ବକପ ବିଜୟୀ କଙ୍ଗାରୁ କ୍ରିକେଟରଙ୍କ ନିଧନରେ ଗଭୀର ଶ୍ରଦ୍ଧାଞ୍ଜଳୀ ଜଣାଇଛି ।
ଅଷ୍ଟ୍ରେଲିଆ ଗଣମାଧ୍ୟମର ସୂଚନା ଅନୁସାରେ, ଶନିବାର ରାତି ପ୍ରାୟ 11.00ଟାରେ କୁଇନ୍ସଲ୍ୟାଣ୍ଡରେ ଆଲିସ ବ୍ରିଜ ହରଭେ ରେଞ୍ଜ ରୋଡ୍ ନିକଟରେ ସାଇମଣ୍ଡ୍ସଙ୍କ କାର୍ ଦୁର୍ଘଟଣାର ଶିକାର ହୋଇଥିଲା । ଏହାପରେ ତାଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା । ତାଙ୍କୁ ବଞ୍ଚାଇବାକୁ ଡାକ୍ତରୀଟିମ ସମସ୍ତ ପ୍ରୟାସ କରିଥିଲେ ମଧ୍ୟ ନିରାଶ ହୋଇଥିଲେ । ଦୁର୍ଘଟଣାରେ ତାଙ୍କର ଶରୀରର ଗୁରୁତ୍ବପୂର୍ଣ୍ଣ ଅଙ୍ଗରେ ଗଭୀର ଆଘାତ ଲାଗିଥିଲା ଫଳରେ ତାଙ୍କର ମୃତ୍ୟୁ ହୋଇଯାଇଥିଲା । ଏହା ପୂର୍ବରୁ ଗତ ମାର୍ଚ୍ଚ ମାସରେ ଅଷ୍ଟ୍ରେଲିଆରୁ ଆସିଥିଲା ଦୁଇଟି ଦୁଃଖଦ ଖବର । ମାତ୍ର 52 ବର୍ଷରେ କିମ୍ବଦନ୍ତୀ କ୍ରିକେଟର ସେନ ୱାର୍ଣ୍ଣଙ୍କ ହୃଦଘାତରେ ବିୟୋଗ ହୋଇଥିଲା ଓ ସମାନ ଦିନ ଅଷ୍ଟ୍ରେଲିଆର ଅନ୍ୟତମ ଜଣାଶୁଣା କ୍ରିକେଟର ରୋଡ୍ ମାର୍ଶଙ୍କର ପରଲୋକ ହୋଇଥିଲା । ଫଳରେ ଅଷ୍ଟ୍ରେଲୀୟ କ୍ରିକେଟ ତଥା ବିଶ୍ବ କ୍ରିକେଟ ପାଇଁ ଏହା ଆଉ ଏକ ବଡ ଦୁଃଖର ଖବର ପାଲଟିଛି ।