ଲାହୋର: ପାକିସ୍ତାନ ମାଟିରେ ଅଷ୍ଟ୍ରେଲିଆର ଐତିହାସିକ ଟେଷ୍ଟ ସିରିଜ ବିଜୟ । ଲାହୋରରେ ଖେଳାଯାଉଥିବା ପାକିସ୍ତାନ ବିପକ୍ଷ ତୃତୀୟ ଟେଷ୍ଟକୁ ପାଟ୍ କମିନ୍ସଙ୍କ ନେତୃତାଧୀନ ଅଷ୍ଟ୍ରେଲିଆ ଟିମ ୧୧୫ ରନ୍ରେ ଜିତିନେଇଛି । ଫଳରେ ତିନି ମାଚ୍ ବିଶିଷ୍ଟ ଟେଷ୍ଟ ସିରିଜକୁ ୧-୦ରେ ହାତେଇଛି ଅଷ୍ଟ୍ରେଲିଆ । ପ୍ରାୟ ୨୪ ବର୍ଷ ପରେ ପାକିସ୍ତାନ ଗସ୍ତରେ କୌଣସି ଦ୍ବିପାକ୍ଷିକ ସିରିଜ ଖେଳିବାକୁ ଯାଇଥିଲା ଅଷ୍ଟ୍ରେଲିଆ ପୁରୁଷ କ୍ରିକେଟ ଟିମ । ଏଥିସହିତ ଗଦ୍ଦାଫି ଷ୍ଟାଡିୟମ ଲାହୋରରେ ମଧ୍ୟ ୧୩ ବର୍ଷ ପରେ ଏକ ଟେଷ୍ଟ ମ୍ୟାଚ୍ ଖେଳାଯାଇଥିଲା । ଶୁକ୍ରବାର ତୃତୀୟ ଟେଷ୍ଟର ଶେଷ ଦିନରେ ପାକିସ୍ତାନକୁ ୨୩୫ ରନ୍ରେ ଅଲଆଉଟ୍ କରି ୧୧୫ ରନ୍ର ବିଜୟ ହାସଲ କରିଛି ପାଟ୍ କମିନ୍ସଙ୍କ ଟିମ ।
ଚତୁର୍ଥ ଦିନର ଅସମାପ୍ତ ସ୍କୋର ୭୩/୦ରୁ ଶେଷ ଦିନର ଖେଳ ଆରମ୍ଭ କରିଥିଲା ଘରୋଇ ଟିମ । ଦଳୀୟ ସ୍କୋର ୭୭ ଥିବାବେଳେ ଅବଦୁଲ୍ଲା ସାଫିକ୍ଙ୍କୁ ଆଲେକ୍ସ କ୍ୟାରୀଙ୍କ ଦ୍ବାରା କ୍ୟାଚ୍ ଆଉଟ୍ କରାଇ କେମରନ ଗ୍ରୀନ ଅଷ୍ଟ୍ରେଲିଆକୁ ପ୍ରଥମ ସଫଳତା ଭେଟିଦେଇଥିଲେ । ପରେ ଆଝାର ଅଲୀ ଇମାମ ଉଲ-ହକ୍ଙ୍କ ସହ ଇଂନିସ ସମ୍ଭାଳିଥିଲେ ମଧ୍ୟ ବେଶୀ ସମୟ ତିଷ୍ଠି ପାରିନଥିଲେ । ମାତ୍ର ରନ୍ରେ ବ୍ୟାଟିଂ କରୁଥିବାବେଳେ ଭେଟେରାନ ସ୍ପିନର ନାଥନ ଲାୟନଙ୍କ ଶିକାର ହୋଇଥିଲେ । ପରେ କ୍ୟାପଟେନ ବାବର ଆଜମଙ୍କ ସହ ମିଶି ଇମାମ ଉଲ-ହକ୍ ଇଂନିସକୁ ଆଗକୁ ବଢାଇଥିଲେ ।