ନୂଆଦିଲ୍ଲୀ: ଅଷ୍ଟ୍ରେଲିଆ କିମ୍ବଦନ୍ତୀ କ୍ରିକେଟର ଆଣ୍ଡ୍ରୟୁ ସାଇମଣ୍ଡସଙ୍କ ପରଲୋକ ଖବର କ୍ରିକେଟ ଜଗତକୁ ଦୋହଲାଇ ଦେଇଛି । ଆଣ୍ଡ୍ରୟୁ ସାଇମଣ୍ଡ୍ସଙ୍କ ଆକସ୍ମିକ ନିଧନରେ ଶୋକବ୍ୟକ୍ତ କରିଛନ୍ତି ଭାରତୀୟ କ୍ରିକେଟର ହରଭଜନ ସିଂ । ଆଣ୍ଡ୍ରୟୁ ସାଇମଣ୍ଡ୍ସଙ୍କ ପରିବାର ଏବଂ ବନ୍ଧୁଙ୍କୁ ସମବେଦନା ଜଣାଇଛନ୍ତି ହରଭଜନ ।
ଆଣ୍ଡ୍ରୟୁ ସାଇମଣ୍ଡ୍ସଙ୍କ କ୍ୟାରିୟରରେ ଅନେକ ବିବାଦ ରହିଥିଲା ଯାହା ଚର୍ଚ୍ଚାର ବିଷୟ ହୋଇଥିଲା । କାହା ସହିତ ଝଗଡା କରିବା ହେଉ କି ପଡିଆରେ କାହା ସହ କଥା କଟାକଟି ସବୁ ପାଇଁ ଚର୍ଚ୍ଚାରେ ଥିଲେ ଆଣ୍ଡ୍ରୟୁ । ଏମିତି ଏକ ବିବାଦ ଥିବା 'ମଙ୍କିଗେଟ' । ଏଥିରେ ହରଭଜନ ସିଂ ଓ ସାଇମଣ୍ଡସଙ୍କ ମଧ୍ୟରେ ବିବାଦ ହୋଇଥିଲା ।
ସିଡନୀ ଟେଷ୍ଟରେ ଆଣ୍ଡ୍ରୟୁ ସାଇମଣ୍ଡସ ଓ ହରଭଜନଙ୍କ ମଧ୍ୟରେ ହୋଇଥିବା ବିବାଦ....
2007-08ରେ ଭାରତୀୟ କ୍ରିକେଟ ଟିମ୍ ଅଷ୍ଟ୍ରେଲିଆ ଗସ୍ତରେ ଥିଲା । 4ଟି ଟେଷ୍ଟର ପ୍ରଥମ ମ୍ୟାଚକୁ ଅଷ୍ଟ୍ରେଲିଆ 337 ରନରେ ଜିତିଥିଲା । 2008 ଜାନୁଆରୀରେ ସିଡନୀରେ ଦ୍ବିତୀୟ ମ୍ୟାଚ ଖେଳା ଯାଇଥିଲା । ଏଥିରେ ସାଇମଣ୍ଡସ ବ୍ୟାଟିଂ କରୁଥିଲେ । ଏହି ସମୟରେ ହରଭଜନ ସିଂ ଓ ସାଇମଣ୍ଡସଙ୍କ ମଧ୍ୟରେ କଥା କଟାକଟି ହୋଇଥିଲେ ।
ପରେ ହରଭଜନ ତାଙ୍କୁ ମାଙ୍କଡ କହିଥିବା ଅଭିଯୋଗ କରିଥିଲେ ଆଣ୍ଡ୍ରୟୁ ସାଇମଣ୍ଡ୍ସ । ଏନେଇ ହରଭଜନଙ୍କୁ 3 ଟେଷ୍ଟ ମ୍ୟାଚରୁ ବାଦ୍ ଦିଆଯାଇଥିଲା । ବିବାଦକୁ ନେଇ ଭାରତୀୟ କ୍ରିକେଟ ଦଳ ଅଧାରୁ ଅଷ୍ଟ୍ରେଲିଆ ଗସ୍ତ ବନ୍ଦ କରିବା ଭଳି ସ୍ଥିତି ମଧ୍ୟ ଉପୁଜିଥିଲା । ଅଷ୍ଟ୍ରେଲିଆ ଗଣମାଧ୍ୟମ ଭଜିଙ୍କ ନାମରେ ମଧ୍ୟ କିଛି ଭୁଲ ତଥ୍ୟ ଆଧାରିତ ଖବର ଲେଖିଥିଲେ । ଏହାକୁ ନେଇ ବିସିସିଆଇ ଗସ୍ତକୁ ଅଧାରେ ରଖିବାକୁ କହିଥିଲା । ମାମଲା ସିଡନୀ କୋର୍ଟରେ ପହଞ୍ଚିଥିଲା । ପ୍ରମାଣ ଅଭାବରୁ ଘଟଣାର ସତ୍ୟତା ଜଣାପଡି ନଥିଲା । ଏହାପରେ ହରଭଜନଙ୍କ ଉପରୁ 3 ଟେଷ୍ଟ ମ୍ୟାଚର ପ୍ରତିବନ୍ଧକ ହଟାଇଯାଇଥିଲା । ଏହି ଘଟଣା ଆଜି ବି ମଙ୍କିଗେଟ ମାମଲା ନେଇ ଚର୍ଚ୍ଚାହୁଏ ।