ଅହମ୍ମଦାବାଦ:ଚଳିତ ବିଶ୍ବକପ 2023ରେ ସେମିଫାଇନାଲକୁ ପ୍ରବେଶ କରିବାକୁ ବିଫଳ ହୋଇଛି ଆଫଗାନିସ୍ତାନ । ଦଳ ଚଳିତ ବିଶ୍ବକପରେ ସେମିରେ ପ୍ରବେଶ ନକରି ମଧ୍ୟ ଭଲ ପ୍ରଦର୍ଶନ କରିଛି । ଦଳର ଜଣେ ଖେଳାଳିଙ୍କୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଆଫଗାନିସ୍ତାନ କ୍ରିକେଟର ରେହମାନୁଲ୍ଲା ଗୁରବାଜଙ୍କୁ ଭୁରି ଭୁରି ପ୍ରଶଂସା କରାଯାଉଛି । ସୋସିଆଲ ମିଡିଆରେ ତାଙ୍କର ପ୍ରଶଂସା କରାଯାଉଛି । ଏହାର କାରଣ ହେଉଛି ରେହମାନୁଲ୍ଲା ଅହମ୍ମଦାବାଦ ରାସ୍ତାରେ ଗରିବ ଲୋକଙ୍କୁ ସାହାଯ୍ୟ କରୁଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଏହାପରେ ତାଙ୍କର ସବୁଠି ପ୍ରଶଂସା । କଂଗ୍ରେସ ନେତା ଶଶୀ ଥରରୁ ମଧ୍ୟ ତାଙ୍କ କାର୍ଯ୍ୟକୁ ପ୍ରଶଂସା ନକରି ରହିପାରି ନାହାନ୍ତି ।
ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଦକ୍ଷିଣ ଆଫ୍ରିକା ବିପକ୍ଷରେ ଦଳ ତାର ଶେଷ ଲିଗ ମ୍ୟାଚ ଖେଳିଥିଲା । ଏହି ମ୍ୟାଚରେ ଦଳ ପରାସ୍ତ ହେବା ସହ ବିଶ୍ବକପରୁ ଦଳର ଅଭିଯାନ ଶେଷ ହୋଇଥିଲା । ଏହି ମ୍ୟାଚ୍ରେ ଗୁରବାଜ 22 ବଲ୍ରେ 25 ରନ୍ କରିଥିଲେ । ମ୍ୟାଚ ପରେ ଆଫଗାନିସ୍ତାନ୍ ବ୍ୟାଟର ରେହମାନୁଲ୍ଲା ଅହମ୍ମଦାବାଦ ରାସ୍ତାରେ ଶୋଇଥିବା ଅସହାୟଙ୍କୁ ସହାୟତାର ହାତ ବଢ଼ାଇଥିଲେ । ଶୋଇଥିବା ଲୋକଙ୍କ ପାଖରେ 500 ଟଙ୍କିଆ ନୋଟ୍ ରଖୁଥିବା ଦେଖିବାକୁ ମିଳିଥିଲା । ବିଶ୍ବକପ୍ରେ ଯଦିଓ ସଫଳ ହୋଇ ନାହାନ୍ତି, ମାତ୍ର ଅସହାୟ ଲୋକଙ୍କୁ ସହାୟତାର ହାତ ବଢାଇ ପ୍ରଶଂସା ସାଉଁଟିଛନ୍ତି । ଗୁରବାଜ ଅସହାୟଙ୍କୁ ସହାୟତା କରୁଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।