ଚେନ୍ନାଇ: ଲୋକପ୍ରିୟ ତାମିଲ ଟେଲିଭିଜନ ଅଭିନେତ୍ରୀ ଚିତ୍ରା କାମରାଜ ଆତ୍ମହତ୍ୟା କରିଥିବା ଖବର ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ବୁଧବାର ଦିନ ଚେନ୍ନାଇର ନାଜରାଥପେଟର ଏକ ହୋଟେଲ ରୁମରେ ‘ପାଣ୍ଡିଆନ୍ ଷ୍ଟୋରେଜ’ ଅଭିନେତ୍ରୀଙ୍କ ମୃତଦେହ ମିଳିଛି । ମୃତ୍ୟୁ ବେଳକୁ ତାଙ୍କୁ ମାତ୍ର 29 ବର୍ଷ ହୋଇଥିଲା । ଆତ୍ମହତ୍ୟା କରିଥିବା ନେଇ ସୂଚନା ।
ଖବର ଅନୁଯାୟୀ, ହୋଟେଲ ମ୍ୟାନେଜମେଣ୍ଟ ତରଫରୁ ଏହି ଘଟଣା ସମ୍ପର୍କରେ ସୂଚନା ପାଇବା ପରେ ଏ ସମ୍ପର୍କରେ ତଦନ୍ତ ଆରମ୍ଭ କରିଥିଲା ନାଜରାଥପେଟ ପୋଲିସ । ଏହାସହ ଏକ ମାମଲା ମଧ୍ୟ ରୁଜୁ କରାଯାଇଛି ।
ଜଣେ ପୋଲିସ ଅଧିକାରି କହିଛନ୍ତି, ‘ସୂଚନାକୁ ଆଧାର କରି ଆମେ ତୁରନ୍ତ ହୋଟେଲରେ ପହଞ୍ଚିଥିଲୁ । ମୃତଦେହ ଉଦ୍ଧାର କରାଯାଇ କିଲପୌକ ସରକାରୀ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ପଠାଯାଇଛି । ବର୍ତ୍ତମାନ ଆମେ ମୃତ୍ୟୁର କାରଣ ଜାଣିବାକୁ ଯାଞ୍ଚ ଆରମ୍ଭ କରିଦେଇଛୁ ।’