ମୁମ୍ବାଇ: ଲୋକପ୍ରିୟ ହିନ୍ଦୀ ଧାରାବାହିକ ଦିଆ ଅର ବାତୀ ହମ୍ ର ଅଭିନେତ୍ରୀ ଦୀପିକା ସିଂ ଗୋଏଲଙ୍କ ମା' କୋରୋନା ପଜିଟିଭ ଚିହ୍ନଟ ହୋଇଛନ୍ତି । କୋଭିଡ-19 ପରୀକ୍ଷାର ରିପୋର୍ଟ ସମ୍ପୃକ୍ତ ଡାକ୍ତରଖାନା ପ୍ରଦାନ କରିନଥିବାବେଳେ ରିପୋର୍ଟର ଏକ ଫଟୋ ଉଠାଇ ନେବାକୁ କହିବାରୁ ଉଦବେଗ ପ୍ରକାଶ କରିଛନ୍ତି ଅଭିନେତ୍ରୀ ।
ଏନେଇ ଅଭିନେତ୍ରୀ ଜଣଙ୍କ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରି ଦିଲ୍ଲୀ ସିଏମ ଅରବିନ୍ଦ କେଜ୍ରିୱାଲଙ୍କୁ ତାଙ୍କ ପରିବାରକୁ ଯଥାଶୀଘ୍ର ଚିକିତ୍ସା ସହାୟତା ଯୋଗାଇବାକୁ ଅନୁରୋଧ କରିଛନ୍ତି ।
ଭିଡିଓରେ ଦୀପିକା ଏପରି କହିଛନ୍ତି ଯେ ମୋ ମା କୋରୋନାରେ ଆକ୍ରାନ୍ତ ହୋଇଛନ୍ତି । ମୋ ବାପା ମା ଦିଲ୍ଲୀରେ ରହୁଛନ୍ତି । ଲେଡି ହାର୍ଡିଙ୍ଗ ହସ୍ପିଟାଲରେ ମାଙ୍କ ପରୀକ୍ଷା କରାଯାଇଥିବାବେଳେ ସେମାନେ ରିପୋର୍ଟ ଦେଇନାହାଁନ୍ତି । କେବଳ ରିପୋର୍ଟର ଫଟୋ ଉଠାଇବାକୁ ଅନୁମତି ଦେଇଥିଲେ । ସମ୍ପୃକ୍ତ କର୍ମଚାରୀ ଯେଉଁମାନେ ବି ଏହାକୁ ଦେଖୁଛନ୍ତି, ଏଥିପ୍ରତି କିଛି ପଦକ୍ଷେପ ନିଅନ୍ତୁ ବୋଲି କହିଛନ୍ତି ଅଭିନେତ୍ରୀ ।
ଭିଡିଓରେ ସେ କହିଛନ୍ତି ଯେ ଡାକ୍ତରଖାନା ତାଙ୍କୁ ରିପୋର୍ଟ ଦେଇ ନ ଥିବାରୁ ତାଙ୍କ ପିତା ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ମାଆଙ୍କ ବୟସ 59 ବର୍ଷ ହୋଇଥିବା ବେଳେ ବିନା ରିପୋର୍ଟରେ କୌଣସି ଡାକ୍ତରଖାନାରେ ଭର୍ତ୍ତି କରି ପାରୁନାହାଁନ୍ତି । ସେପଟେ ଯୌଥ ପରିବାର ହୋଇଥିବାରୁ ମୋଟ 45 ଜଣ ସଦସ୍ୟ ଘରେ ରୁହନ୍ତି । ପୁରା ପରିବାରଙ୍କୁ ସଂକ୍ରମଣ ହେବାର ଆଶଙ୍କା ରହିଥିବାବେଳେ ସେମାନଙ୍କର କିପରି ପରୀକ୍ଷା କରିବେ, ଏ ନେଇ ସେ ଦିଲ୍ଲୀ ସରକାରଙ୍କର ସାହାଯ୍ୟ ଲୋଡିଛନ୍ତି ।
ବର୍ତ୍ତମାନ ସ୍ବାମୀ ଏବଂ ପୁଅଙ୍କ ସହ ମୁମ୍ବାଇରେ ରହୁଥିବା ଦୀପିକା ସେମାନଙ୍କୁ ସାହାଯ୍ୟ କରିବା ପାଇଁ ଯଥାସମ୍ଭବ ଚେଷ୍ଟା କରୁଛନ୍ତି ଏବଂ ଫୋନରେ ପରିବାର ସହ ନିରନ୍ତର ଯୋଗାଯୋଗରେ ଅଛନ୍ତି।
