ଇସଲାମବାଦ: ଫେମସ ପାକିସ୍ତାନୀ ସଙ୍ଗୀତକାର ତଥା ଗାୟକ ଫରହାଦ ହୁମାୟୁନଙ୍କ ଅକାଳ ବିୟୋଗ ସମସ୍ତଙ୍କୁ ଚକିତ କରିଛି । ମାତ୍ର 42 ବର୍ଷ ବୟସରେ ସେ ଦୁନିଆ ଛାଡି ଚାଲିଯାଇଛନ୍ତି । ଫରହାଦଙ୍କ ଦେହାନ୍ତ ଖବର ତାଙ୍କ ବ୍ୟାଣ୍ଡ ଓଭରଲୋଡର ଅଫିସିଆଲ୍ ଫେସବୁକ୍ ପେଜରେ ଦିଆଯାଇଛି । ସେପଟେ ତାଙ୍କ ମୃତ୍ୟୁରେ ପାକିସ୍ତାନ କଳା ଜଗତରେ ଶୋକର ଛାୟା ଖେଳିଯାଇଛି ।
ସେହିପରି ତାଙ୍କ ମୃତ୍ୟୁ ସୂଚନା ଦିଆଯାଇ ପୋଷ୍ଟରେ ଲେଖାଯାଇଛି, ‘ଆଜି ସକାଳେ ଶାନଦାର ଫରହାଦ ହୁମାୟୁଁ ଆମକୁ ଛାଡି ଚାଲିଯାଇଛନ୍ତି । ସବୁବେଳେ ଚ୍ୟାଲେଞ୍ଜ ନେବାକୁ ଜିଦ୍ ରଖୁଥିବା, ନିଜ ଅନ୍ଦାଜରେ ରହୁଥିବା ମଜାଳିଆ ମଣିଷ ଥିଲେ ସେ । ଭଗବାନ ତାଙ୍କ ଆତ୍ମାକୁ ଶାନ୍ତି ଦିଅନ୍ତୁ ।’
ସେପଟେ ଫରହାଦଙ୍କ ମୃତ୍ୟୁ ଖବର ଶୁଣି ଫେମସ ଗାୟକ ଆତିଫ ଅସଲମ ଟ୍ବିଟରରେ ଶୋକ ପ୍ରକାଶ କରିଛନ୍ତି । ସେ ଏକ ପୋଷ୍ଟରେ ଲେଖିଛନ୍ତି, ‘ଧନ୍ୟବାଦ ଫାଦି ଆମକୁ ଶାନଦାର ଗୀତ ଯୋଗାଇଥିବାରୁ । ଆମକୁ ଭଲ ସମୟ ଦେବା ସହ ମୋର ପ୍ରଥମ ଆଲବମରେ କାମ କରିବା ପାଇଁ । ମୁଁ ଆମ ଆଗାମୀ କାମକୁ ନେଇ ଉତ୍ସାହିତ ଥିଲା । ହେଲେ ଦୁର୍ଭାଗ୍ୟବଶତଃ ଯାହା ଏବେ ଆଉ ପୁରା ହୋଇପାରିବ ନାହିଁ ।’
ଆତିଫଙ୍କ ବ୍ୟତୀତ ଅଭିନେତା ତଥା ଗାୟକ ଅଲ୍ଲୀ ଜଫର ମଧ୍ୟ ଶୋକ ପ୍ରକାଶ କରି ସୋସିଆଲ ମିଡିଆ ପୋଷ୍ଟରେ ଲେଖିଛନ୍ତି, ‘ବିଦାୟ ପୁରୁଣା ବନ୍ଧୁ । ତୁମେ ବହୁତ ଲୋକଙ୍କ ପ୍ରେରଣା ଥିଲ । ସଙ୍ଗୀତ ଏବଂ ଲୋକଙ୍କ ଜୀବନରେ ଆପଣଙ୍କର ଅବଦାନ କିଛି ଧାଡିରେ ବ୍ୟାଖ୍ୟା କରାଯାଇପାରିବ ନାହିଁ । ତୁମେ ଜଣେ ସଙ୍ଗୀତଜ୍ଞ ଏବଂ କଳାକାରଠାରୁ ଅଧିକ । ତୁମେ ଜଣେ ଫାଇଟର ଏବଂ ମହାନ ବ୍ୟକ୍ତି ଥିଲ ।’
