ବେଙ୍ଗାଲୁରୁ: ଆଉ ନାହାନ୍ତି କନ୍ନଡର ପାୱାର ଷ୍ଟାର ପୁନିତ ରାଜକୁମାର । ହୃଦଘାତ ଯୋଗୁଁ ତାଙ୍କର ଅକାଳ ବିୟୋଗ ଘଟିଛି । ମୃତ୍ୟୁ ବେଳକୁ ତାଙ୍କୁ ମାତ୍ର ୪୭ ବର୍ଷ ହୋଇଥିଲା । ସେପଟେ ତାଙ୍କ ବିୟୋଗରେ ଅନେକ ସେଲିବ୍ରିଟି, ଫ୍ୟାନ୍ସ ସ୍ତବ୍ଧ ହୋଇଯାଇଥିବା ବେଳେ ତାଙ୍କ ଅମର ଆତ୍ମାର ସଦଗତି କାମନା କରିଛନ୍ତି ।
ତାଙ୍କୁ ଛାତିରେ ଯନ୍ତ୍ରଣା ହେବା ପରେ ସକାଳ ପ୍ରାୟ ସାଢେ ୧୧ଟା ସମୟରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏକ ସ୍ବତନ୍ତ୍ର ଡାକ୍ତରୀ ଦଳ ତାଙ୍କର ସ୍ବାସ୍ଥ୍ୟବସ୍ଥା ନିରନ୍ତର ଭାବେ ଯାଞ୍ଚ କରୁଥିଲେ । କିନ୍ତୁ ତାଙ୍କର ସ୍ବାସ୍ଥ୍ୟବସ୍ଥା ବିଗୁଡିବା ପରେ ତାଙ୍କୁ ICUକୁ ସ୍ଥାନାନ୍ତର କରାଯାଇଥିଲା ବୋଲି ବିକ୍ରମ ହସ୍ପିଟାଲର ଡକ୍ଟର ରଙ୍ଗନାଥ ନାୟକ ସୂଚନା ଦେଇଥିଲେ । ଚିକିତ୍ସାଧୀନ ଅବସ୍ଥାରେ ସେ ନିଜ ଭାଇ ଓ ସୁପରଷ୍ଟାର ଶିବା ରାଜକୁମାରଙ୍କୁ ସେମାନଙ୍କ ଆଗାମୀ ଫିଲ୍ମ Bhajarangi 2 ପାଇଁ ଶୁଭେଚ୍ଛା ଜଣାଇଥିଲେ ।
କିନ୍ତୁ ଚିକିତ୍ସାଧୀନ ଅବସ୍ଥାରେ ତାଙ୍କର ଆଜି ମୃତ୍ୟୁ ଘଟିଛି । ଏହାପରେ ପୁରା ସିନେମା ଜଗତ ହୋଇଯାଇଛି ସ୍ତବ୍ଧ । ଖୁବ କମ ବୟସରେ ସେ ଦୁନିଆ ଛାଡ଼ି ଚାଲିଯାଇଥିବା ବେଳେ ବିଭିନ୍ନ ମହଲରୁ ତାଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି । ତେବେ ସୂଚନା ଥାଉ କି ପୁନିତ ହେଉଛନ୍ତି କନ୍ନଡ ସୁପରଷ୍ଟାର ଡକ୍ଟର ରାଜକୁମାରଙ୍କୁ ବଡ ପୁଅ ।
ଶିଶୁ କଳାକାର ଭାବେ ପାଇଥିଲେ ରାଷ୍ଟ୍ରୀୟ ପୁରସ୍କାର:-
ପୁନିତ ୧୨ଟି ଫିଲ୍ମରେ ଶିଶୁ କଳାକାର ଭାବେ ନଜର ଆସିଥିଲେ । ୧୯୮୬ ମସିହାରେ ଫିଲ୍ମ 'ବେଟ୍ଟଦ ହୁୱୁ' ପାଇଁ ତାଙ୍କୁ ସର୍ବଶ୍ରେଷ୍ଠ ଶିଶୁ କଳାକାର ଭାବେ ରାଷ୍ଟ୍ରୀୟ ଫିଲ୍ମ ପୁରସ୍କାର ମିଳିଥିଲା ।