ସୁବର୍ଣ୍ଣପୁର: ‘ସଲାବୁଢାର ବଦଲା’କୁ ଜାତୀୟ ପୁରସ୍କାର । ସୁବର୍ଣ୍ଣପୁର ଜିଲ୍ଲାର ଲୋକପ୍ରିୟ ଚଳଚ୍ଚିତ୍ର ନିର୍ଦ୍ଦେଶକ ତଥା ନିର୍ମାତା ସବ୍ୟସାଚୀ ମହାପାତ୍ରଙ୍କ କୋଶଲି ଫିଚର ଫିଲ୍ମ ‘ସଲାବୁଢା ବଦଲା’କୁ ୬୭ତମ ଜାତୀୟ ଫିଲ୍ମ ଫେୟାରରେ ସର୍ବଶ୍ରେଷ୍ଠ ଫିଲ୍ମର ମାନ୍ୟତା ମିଳିଛି । ‘ସଲାବୁଢା’ ଟ୍ରାୟୋଲୋଜିର ଏ ହେଉଛି ତୃତୀୟ ସିନେମା । ‘ସଲାବୁଢା’ ଓ ‘ଆଦିମ ବିଚାର’ର ଅପୁର୍ବ ସଫଳତା ପରେ ‘ସଲାବୁଢାର ବଦଲା’କୁ ଦର୍ଶକମାନେ ବେଶ ପସନ୍ଦ କରିଥିଲେ । ଏହି ଚଳଚ୍ଚିତ୍ରଟି ସୁବର୍ଣ୍ଣପୁର ଜିଲ୍ଲାର ବିଭିନ୍ନ ଗାଁରେ ସୁଟିଂ ହୋଇଥିବା ବେଳେ ଗ୍ରାମଞ୍ଚଳର ସାଧରଣ ଲୋକଙ୍କ ଚାଲି ଚଳଣିର ଝଲକ ଚଳଚ୍ଚିତ୍ରରେ ଦେଖିବାକୁ ମିଳିଛି।
ଓଡିଆ ସଂସ୍କୃତି ଓ ପରମ୍ପରାର ନିଛକ ଝଲକ ପ୍ରଦର୍ଶିତ କରୁଥିବା ଏହି ସିନେମା ଏକ ସଶକ୍ତ ସାମାଜିକ ବାର୍ତ୍ତା ବହନ କରେ । କ୍ଷମା ଯେ ସର୍ବଶ୍ରେଷ୍ଠ ପ୍ରତିଶୋଧ ହୋଇପାରେ ତାହା ହିଁ ଏ ସିନେମାର ମୁଖ୍ୟ କଥା । ‘ସଲାବୁଢା’ ଫେମ ଅଟଳ ବିହାରୀ ପଣ୍ଡାଙ୍କ ସମେତ ଜଗଦାନନ୍ଦ ଛୁରିଆ, ପ୍ରଦ୍ୟୁମ୍ନ କୁମାର ସାହୁ, ଲୋଚନି ବାଗ ପ୍ରମୁଖଙ୍କ ନିଖୁଣ ଅଭିନୟ ଚଳଚ୍ଚିତ୍ରକୁ ଅନେକ ସଫଳତା ଦେଇଛି।