ମୁମ୍ବାଇ:ବଲିଉଡ଼ ଅଭିନେତ୍ରୀ ଶିଳ୍ପା ସେଟ୍ଟୀ ଓ ପର୍ଣ୍ଣୋଗ୍ରାଫି ମାମଲାରେ ଫସିଥିବା ସ୍ବାମୀ ରାଜ କୁନ୍ଦ୍ରାଙ୍କ ବିରୋଧରେ ପ୍ରତାରଣା ତଥା ମାନସିକ ନିର୍ଯାତନା ଅଭିଯୋଗ ଆଣିଛନ୍ତି ଅଭିନେତ୍ରୀ ଶର୍ଲିନ ଚୋପ୍ରା । ସୋସିଆଲ ମିଡିଆରେ FIR ଦାଏର କରିବା ସମ୍ପର୍କରେ ଶର୍ଲିନ୍ ସୂଚନା ଦେଇଛନ୍ତି । ରାଜକୁନ୍ଦ୍ରା ପର୍ଣ୍ଣୋଗ୍ରାଫି ମାମଲାରେ ଗିରଫ ହେବା ପରେ ଲଗାତାର ଭାବେ ଶର୍ଲିନ ତାଙ୍କୁ ଟାର୍ଗେଟ କରୁଥିବା ଦେଖିବାକୁ ମିଳିଛି ।
ଶର୍ଲିନ ନିଜ ଟ୍ବିଟର ଆକାଉଣ୍ଟରେ ଏ ସମ୍ପର୍କରେ ସୂଚନା ଦେଇଛନ୍ତି । ତେବେ ସେ ଜୁହୁ ପୋଲିସ ଷ୍ଟେସନରେ ରାଜକୁନ୍ଦ୍ରା ଓ ଶିଳ୍ପାଙ୍କ ବିରୋଧରେ ଅଭିଯୋଗ କରିଛନ୍ତି । ଶର୍ଲିନ ଅଭିଯୋଗ କରିଛନ୍ତି ଯେ ଶିଳ୍ପା ତାଙ୍କୁ କୁନ୍ଦ୍ରାଙ୍କ ସହ ଏକ ଚୁକ୍ତିନାମା କରିବାକୁ ପ୍ରଲୋଭିତ କରିଥିଲେ । କୁନ୍ଦ୍ରା ଶର୍ଲିନଙ୍କ କ୍ୟାରିଅରକୁ ନଷ୍ଟ କରିବାକୁ ଧମକ ଦେଇଥିଲେ ଏବଂ ତାଙ୍କ ସହ ୩ଟି ଭିଡିଓ ସୁଟ୍ କରିଥିଲେ ଯାହା ପାଇଁ ତାଙ୍କୁ ଏପର୍ଯ୍ୟନ୍ତ ଦେୟ ପ୍ରଦାନ କରିନାହାନ୍ତି ବୋଲି ସଙ୍ଗୀନ ଅଭିଯୋଗ ଆଣିଛନ୍ତି ଶର୍ଲିନ ।