ଷ୍ଟ୍ରିଟ ଡାନ୍ସର୍ସଙ୍କୁ ଉପହାର ଦେବେ ବରୁଣ

ଆସନ୍ତା ବର୍ଷ ରିଲିଜ ହେବ ବରୁଣ ଓ ଶ୍ରଦ୍ଧାଙ୍କ ଅଭିନୀତ ଫିଲ୍ମ ‘ଷ୍ଟ୍ରିଟ ଡାନ୍ସର 3 ଡି’ । ଫିଲ୍ମରେ ଡାନ୍ସ ର ଓଭରଡୋଜ ଦେଖିବାକୁ ପାଇବେ ଦର୍ଶକ । ଫିଲ୍ମ ଆୟର ଗୋଟିଏ ଭାଗ ଷ୍ଟ୍ରିଟ ଡାନ୍ସର୍ସଙ୍କ କାର୍ଯ୍ୟରେ ଖର୍ଚ୍ଚ କରିବେ ବୋଲି ନିଷ୍ପତ୍ତି ନେଇଛନ୍ତି ବରୁଣ ।

ମୁମ୍ବାଇ: ବରୁଣ ଧୱନଙ୍କ ଆଗାମୀ ଫିଲ୍ମ ‘ଷ୍ଟ୍ରିଟ ଡାନ୍ସର 3ଡି’ ରିଲିଜ ହେବାକୁ ପ୍ରସ୍ତୁତ ହୋଇସାରିଲାଣି । ପୁଣିଥରେ ଦର୍ଶକ ଏହି ଫିଲ୍ମରେ ବରୁଣ ଓ ଶ୍ରଦ୍ଧା କପୁରଙ୍କ କେମେଷ୍ଟ୍ରି ଦେଖିବାକୁ ପାଇବେ । ଇତିମଧ୍ୟରେ ବରୁଣ ଦେଶର ସବୁ ଷ୍ଟ୍ରିଟ ଡାନ୍ସର୍ସଙ୍କୁ ଉପହାର ଦେବାକୁ ନିଷ୍ପତ୍ତି ନେଇଛନ୍ତି । ବର୍ତ୍ତମାନ ସେ ଦେଶର କୋଣ ଅନୁକୋଣରେ ରହୁଥିବା ଡାନ୍ସର୍ସଙ୍କ ପାଇଁ ଏକ ପ୍ଲାଟଫର୍ମ ନିର୍ମାଣ କରିବାକୁ ସ୍ଥିର କରିଛନ୍ତି । ପୂର୍ବରୁ ମଧ୍ୟ ଷ୍ଟ୍ରିଟ ଡାନ୍ସର ଫିଲ୍ମର ନିର୍ଦ୍ଦେଶକ ତଥା କୋରିଓଗ୍ରାଫର ରେମୋ ଡିସୁଜା ଅନେକ ଡାନ୍ସର୍ସଙ୍କୁ ସୁଯୋଗ ଦେଇସାରିଛନ୍ତି ।

ଏବେ ବରୁଣ, ରେମୋ ନିର୍ମାତା ଭୂଷଣ କୁମାର ଏବଂ ରେମୋଙ୍କ ପତ୍ନୀ ଲିଜେଲ ଡିସୁଜାଙ୍କ ସହ ମିଶି ଏକ ରାଷ୍ଟ୍ରବ୍ୟାପୀ ଅଭିଯାନର ଆରମ୍ଭ କରିବାକୁ ଯାଉଛନ୍ତି । ଯେଉଁଥିରେ ଷ୍ଟ୍ରିଟ ଡାନ୍ସର୍ସଙ୍କୁ ଆଗକୁ ବଢିବା ପାଇଁ ପ୍ରେରଣା ଦିଆଯିବ ।

ଏହି ଅବସରରେ ବରୁଣ କହିଛନ୍ତି ଯେ ଫିଲ୍ମର ଉଦ୍ଦେଶ୍ୟ ଦେଶର ଷ୍ଟ୍ରିଟ ପରଫମର୍ସଙ୍କ ସହ ସମ୍ପୃକ୍ତ ହେବା ଏବଂ ତାଙ୍କ ପ୍ରତିଭାକୁ ଦୁନିଆ ସାମ୍ନାକୁ ଆଣିବା । ଆମେ ଏହାର ଆରମ୍ଭ ସେହି ପିଲାଙ୍କ କାହାଣୀରୁ କରିବୁ ଯେଉଁମାନେ ଏହି ଫିଲ୍ମରେ କାମ କରିଛନ୍ତି ।

ଫିଲ୍ମ ଆୟର ଗୋଟିଏ ଭାଗ ଡାନ୍ସର୍ସଙ୍କ କଲ୍ୟାଣ ପାଇଁ ମଧ୍ୟ ଖର୍ଚ୍ଚ କରିବାକୁ ଭୂଷଣ ଏବଂ ରେମୋ ସାର ରାଜି ହୋଇଯାଇଛନ୍ତି । ସେମାନଙ୍କ ମଧ୍ୟରୁ ଏମିତି କିଛି ଅଛନ୍ତି ଯାହାଙ୍କ ପାଖରେ ରହିବା ପାଇଁ ଛାତ ନାହିଁ । ଆୟ ଟଙ୍କାରୁ ସେମାନଙ୍କ ପାଇଁ ଘର କରିବାକୁ ମଧ୍ୟ ଯୋଜନା କରୁଛୁ ବୋଲି କହିଛନ୍ତି ବରୁଣ । ପ୍ରକାଶ ଥାଉ ‘ଷ୍ଟ୍ରିଟ ଡାନ୍ସର 3ଡି’ ଫିଲ୍ମଟି ଆସନ୍ତା ବର୍ଷ ଜାନୁଆରୀ 24ରେ ରିଲିଜ ହେବ ।