ହାଇଦ୍ରାବାଦ:37 ବର୍ଷରେ ପାଦ ଥାପିଲେ ଆଶିକ-2 ଫିଲ୍ମର ଅଭିନେତା ଆଦିତ୍ୟ ରୟ କପୁର । ନଭେମ୍ବର 16, 1985ରେ ମୁମ୍ବାଇର ଏକ ପଞ୍ଜାବୀ ପରିବାରରେ ଜନ୍ମ ହୋଇଥିବା ଆଦିତ୍ୟ ରୟ କପୁରଙ୍କ ବିଷୟରେ ଖୁବ୍ କମ୍ ଲୋକ ଜାଣନ୍ତି ଯେ, ତାଙ୍କ ଜେଜେବାପା ଜଣେ ଚଳଚ୍ଚିତ୍ର ନିର୍ମାତା ଥିଲେ । ଆଦିତ୍ୟଙ୍କ ମାତା ସାଲୋମ ରୟ କପୁର ମଧ୍ୟ ଏକ ସମୟରେ ଗ୍ଲାମର ଦୁନିଆରେ କାମ କରିଛନ୍ତି । ସେ ଦେବ ବାନାର୍ଜୀଙ୍କ ସହ ଏକ ଚଳଚ୍ଚିତ୍ର 'ତୁ ହି ମେରୀ ଜିନ୍ଦେଗି'ରେ ମଧ୍ୟ କାମ କରିଥିଲେ । ଆଦିତ୍ୟ ରୟ କପୁରଙ୍କ ଜେଜେ ରଘୁପତ ରୟ କପୁର 1940 ଦଶକରେ ଚଳଚ୍ଚିତ୍ର ନିର୍ମାଣ କରୁଥିଲେ । ଆଦିତ୍ୟଙ୍କର ତିନି ଭାଇ ଅଛନ୍ତି । ତାଙ୍କ ବଡ ଭାଇ ସିଦ୍ଧାର୍ଥ ରୟ କପୁର ହେଉଛନ୍ତି ଅଭିନେତ୍ରୀ ବିଦ୍ୟା ବାଲନଙ୍କ ସ୍ବାମୀ ତଥା UTV ମୋସନ ପିକ୍ଚରର ସିଇଓ । ତାଙ୍କର ଅନ୍ୟ ଜଣେ ଭାଇ କୁନାଲ ରୟ କପୁର ମଧ୍ୟ ଜଣେ ଅଭିନେତା ।
ଫିଲ୍ମ ଇଣ୍ଡଷ୍ଟ୍ରିରେ ପାଦ ଦେବା ପୂର୍ବରୁ ଆଦିତ୍ୟ ରୟ କପୁର ଏକ ଲୋକପ୍ରିୟ ଭିଜେ ଥିଲେ । ପାଠପଢାରେ ତାଙ୍କର କୌଣସି ବିଶେଷ ଆଗ୍ରହ ନଥିଲା କିମ୍ବା ସେ ଜଣେ ଅଭିନେତା ହେବାକୁ ଚାହୁଁନଥିଲେ । ତାଙ୍କର ସ୍ବପ୍ନ ଥିଲା, ସେ ଜଣେ ପ୍ରସିଦ୍ଧ କ୍ରିକେଟର ହେବେ, କିନ୍ତୁ ଏହା ସମ୍ଭବ ହୋଇନଥିଲା । 2013 ର ଚଳଚ୍ଚିତ୍ର ଆଶିକ-2 ରୁ ତାଙ୍କର କ୍ୟାରିୟର ଆରମ୍ଭ ହୋଇଥିଲା । ଏହି ଚଳଚ୍ଚିତ୍ରରେ ତାଙ୍କର ଅଭିନୟକୁ ଲୋକମାନେ ବହୁତ ପ୍ରଶଂସା କରିଥିଲେ । ଏହି ଚଳଚ୍ଚିତ୍ରରେ ଶ୍ରଦ୍ଧା କପୁରଙ୍କ ସହ ତାଙ୍କର କେମେଷ୍ଟ୍ରି ଦର୍ଶକଙ୍କୁ ବହୁତ ପସନ୍ଦ ଆସିଥିସା ଏବଂ ଫିଲ୍ମଟି ବକ୍ସ ଅଫିସରେ ମଧ୍ୟ ବ୍ଲକବଷ୍ଟର ବୋଲି ପ୍ରମାଣିତ ହୋଇଥିଲା । ଏହି ଚଳଚ୍ଚିତ୍ର ପରେ ଆଦିତ୍ୟ ରୟ କପୁର ଏବଂ ଶ୍ରଦ୍ଧା କପୁରଙ୍କ ସମ୍ପର୍କ ବିଷୟରେ ମଧ୍ୟ ଚର୍ଚ୍ଚା ହୋଇଥିଲା ।