ସୁଶାନ୍ତଙ୍କ ଆତ୍ମହତ୍ୟା: ତଦନ୍ତ ପରିସରରେ ୟଶ ରାଜ ଫିଲ୍ମସ କଣ୍ଟ୍ରାକ୍ଟ

ସାମ୍ନାକୁ ଆସିଲା ସୁଶାନ୍ତଙ୍କ ସହ ସମ୍ପୃକ୍ତ ଥିବା ଆଉ ଏକ ଖବର । ସେ ୟଶ ରାଜ ଫିଲ୍ମସ ସହ ଏକ କଣ୍ଟ୍ରାକ୍ଟ ସାଇନ କରିଥିଲେ । ଯାହା ଉପରେ ଏବେ ତଦନ୍ତ ଚଳାଇଛି ପୋଲିସ ।

ମୁମ୍ବାଇ: ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ପରେ ବଲିଉଡର ଅନେକ ପ୍ରଯୋଜକ, ନିର୍ମାତାଙ୍କ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏହି ମାମଲାରେ ଗୁରୁବାର ବାନ୍ଦ୍ରା ପୋଲିସ ସୁଶାନ୍ତଙ୍କ ଗାର୍ଲଫ୍ରେଣ୍ଡ ତଥା ଅଭିନେତ୍ରୀ ରିଆ ଚକ୍ରବର୍ତ୍ତୀଙ୍କ ବୟାନ ରିକେର୍ଡ କରିଥିଲା । ପାଖାପାଖି 9 ଘଣ୍ଟାର କଥାବାର୍ତ୍ତାରେ ଅନେକ ନୂଆ କଥା ସାମ୍ନାକୁ ଆସିଛି । ରିଆ ୟଶରାଜ ଫିଲ୍ମସ କଣ୍ଟ୍ରାକ୍ଟ ବିଷୟରେ ମଧ୍ୟ ଖୁଲାସା କରିଥିଲେ । ଏବେ ଏହାକୁ ଆଧାର କରି ପୋଲିସ ୟଶ ରାଜ ଫିଲ୍ମସକୁ ସୁଶାନ୍ତଙ୍କ କଣ୍ଟ୍ରାକ୍ଟ ବିଷୟରେ ଜାଣିବା ପାଇଁ ଏକ ଚିଠି ପଠାଇଛି । ଏହାର ସୂଚନା ମିଡିଆକୁ ଜଣେ ପୋଲିସ ଅଧିକାରୀ ଶୁକ୍ରବାର ଦେଇଛନ୍ତି । ଆଉ ୟଶ ରାଜ ଫିଲ୍ମସ କଣ୍ଟ୍ରାକ୍ଟରେ ସୁଶାନ୍ତଙ୍କ ସାଇନ କପି ମଧ୍ୟ ମଗାଯାଇଛି ।

ତାଙ୍କ ଆତ୍ମହତ୍ୟାରେ ଏଯାବତ ପୋଲିସ 13 ଜଣଙ୍କ ବୟାନ ରେକର୍ଡ କରିସାରିଲାଣି । ଆଗାମୀ ତଦନ୍ତ ପାଇଁ ପୋଲିସ ତାଙ୍କ ବନ୍ଧୁବାନ୍ଧବ, ପରିବାର ସଦସ୍ୟା ଓ କିଛି ପ୍ରଯୋଜକ ଏବଂ ନିର୍ମାତାଙ୍କ ବୟାନ ରେକର୍ଡ କରିବ ।

ପ୍ରକାଶ ଥାଉକି ଗତ 14 ତାରିଖରେ ମୁମ୍ବାଇ ସ୍ଥିତ ନିଜ ନିବାସରେ ରଶି ଲଗାଇ ସୁଶାନ୍ତ ଆତ୍ମହତ୍ୟା କରିଥିଲେ । ଯାହାପରେ ତାଙ୍କ ଫ୍ୟାନ୍ସଙ୍କ କ୍ରୋଧର ଶିକାର ହେବାରେ ଲାଗିଛନ୍ତି ବଲିଉଡର କିଛି ଫେମସ କଳାକାର । ବର୍ତ୍ତମାନ ବଲିଉଡରେ ଚାଲିଥିବା ପରିବାରବାଦକୁ ନେଇ ସୋସିଆଲ ମିଡିଆରେ ବାକ୍ ଯୁଦ୍ଧ ।