ମୁମ୍ବାଇ: କୋରୋନା ମହାମାରୀରେ ମଧ୍ୟ କାର୍ଯ୍ୟକଳାପ ଜାରି ରଖିବାକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଘୋଷଣା କରିଛନ୍ତି । ସେ କହିଛନ୍ତି ଯେ ବଲିଉଡ ସୁପରଷ୍ଟାର ଶାହରୁଖ ଖାନ ଜାନୁଆରୀରେ 8ରେ 26ତମ କୋଲକାତା ଆନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (କେଆଇଏଫଏଫ)ର ଅନଲାଇନରେ ଉଦଘାଟନ କରିବେ । ଯାହାକୁ ନେଇ ବର୍ତ୍ତମାନ ଚର୍ଚ୍ଚା ।
ସାତ ଦିନିଆ ଏହି ମହୋତ୍ସବରେ ବଙ୍ଗୀୟ ଅଭିନେତା ସୌମିତ୍ର ଚାଟାର୍ଜୀଙ୍କୁ ଶ୍ରଦ୍ଧାଞ୍ଜଳି ସହ ଆରମ୍ଭ ହେବ । ଚଳିତ ବର୍ଷ ଆଇକନ ଲେଖକ ତଥା ନିର୍ଦ୍ଦେଶକ ସତ୍ୟଜିତ ରୟଙ୍କ ଜନ୍ମ ଶତବାର୍ଷିକୀ । ଯାହାଙ୍କ ସ୍ମୃତିରେ ଏହି ମହୋତ୍ସବ ସବୁ ବର୍ଷ କରାଯାଏ । ସେହିପରି ଗତ ବର୍ଷ ନଭେମ୍ବରରେ କୋରୋନା ସଂକ୍ରମିତ ପାଇଁ ଚାଟାର୍ଜୀଙ୍କ ମୃତ୍ୟୁ ହୋଇଥିଲ ।
ଏହି ମହୋତ୍ସବରେ ସବୁ ବର୍ଷ ସାମିଲ ହୁଏନ୍ତି ଶାହରୁଖ । ଏବର୍ଷ ପାଇଁ ଘୋଷଣା କରି ମମତା ଟ୍ବିଟରେ ଲେଖିଛନ୍ତି, ‘ଆମେ ଏହି ମହାମାରୀକୁ ଏକାଠି ସାମ୍ନା କରିଛୁ, କିନ୍ତୁ କାର୍ଯ୍ୟକ୍ରମ ବନ୍ଦ ହେବା ଉଚିତ୍ ନୁହେଁ । ଆମେ ଅନଲାଇନ ଏକ ଛୋଟ ସ୍କେଲରେ କେଆଇଏଫଏଫ 2021 ପରିଚାଳନା କରୁଛୁ । ଖୁସି ଯେ ମୋ ଭାଇ ଶାହାରୁଖ ଖାନ ଜାନୁଆରୀ 8ରେ ସମାରୋହ ଉଦ୍ଘାଟନ କରି ଆମ ସହିତ ଯୋଗ ଦେବେ ।’
ସେହିପରି ଉଦ୍ଘାଟନ ସମୟରେ କ୍ଲାସିକ ଫିଲ୍ମ ‘ଅପ୍ପୁ ସଂସାର’ର ପ୍ରଦର୍ଶନ କରାଯିବ । ଯାହା ସୌମିତ୍ରଙ୍କ ଡେବ୍ୟୁ ଫିଲ୍ମ ଥିଲା । କ୍ଷୁଦ୍ର ଏବଂ ଡକ୍ୟୁମେଣ୍ଟାରୀ ବର୍ଗରେ ସମୁଦାୟ 131ଟି ଫିଲ୍ମ ମଧ୍ୟରେ ନନ୍ଦନ ଏବଂ ରବିନ୍ଦ୍ର ସଦନ ସମେତ ସହରର କିଛି ସିନେମାହଲରେ ପ୍ରଦର୍ଶିତ ହେବ । ପ୍ରକାଶ ଥାଉକି ଶାହରୁଖଙ୍କ ସହ ଅମିତାଭ ବଚ୍ଚନଙ୍କ ଠୁ ନେଇ ବଲିଉଡର ଆଗ ଧାଡିର କିଛି କଳାକାର ଏହି ମହୋତ୍ସବରେ ସାମିଲ ହୁଅନ୍ତି ।
