ପୂରଣ ହେଲା ଅଶ୍ବିନୀଙ୍କ ସ୍ବପ୍ନ, ଅମିତାଭଙ୍କ ସହ କରିବେ କାମ

‘ସୋଲେ’ ଫିଲ୍ମ ଫ୍ୟାନ ବୟ ସାଜିବେ ଅମିତାଭଙ୍କ ନିର୍ମାତା । ବୈଜୟନ୍ତୀ ପ୍ରଡକ୍ସନର ଆଗାମୀ ଫିଲ୍ମରେ ନଜର ଆସିବେ ବିଗ ବି ।

ମୁମ୍ବାଇ: ଲୋକପ୍ରିୟ ଅଭିନେତା ଓ ରାଜନେତା ଏନ ଟି ରାମାରାଓଙ୍କ ସହ ଚର୍ଚ୍ଚିତ ହିନ୍ଦୀ ଫିଲ୍ମ ‘ସୋଲେ’ରେ ଅମିତାଭ ବଚ୍ଚନଙ୍କ ଅଭିନୟ ଦେଖି ଦିୱାନା ହୋଇଥିଲେ ନିର୍ମାତା ଅଶ୍ବିନୀ ଦତ୍ତ। ଯାହାପରଠୁ ସେ ଅମିତାଭଙ୍କ ସହ କାମ କରିବାର ସ୍ବପ୍ନ ଦେଖିଆସୁଥିଲେ । ମୁଖ୍ୟ କଥା ହେଲା ଯେ ଏବେ ତାଙ୍କ ସ୍ବପ୍ନ ପୂରଣ ହେବାକୁ ଯାଉଛି । କାରଣ ତାଙ୍କ ଅପକମିଂ ଫିଲ୍ମରେ ଅଭିନୟ କରିବାକୁ ହଁ ମାରିଛନ୍ତି ଅମିତାଭ । ଖାଲି ଏତିକି ନୁହେଁ ଏହି ଫିଲ୍ମରେ ଅମିତାଭଙ୍କ ସହ ସାଉଥ ସୁପରଷ୍ଟାର ପ୍ରଭାସ ଓ ଦୀପିକା ପାଦୁକୋନ ନଜର ଆସିବେ ।

ଦକ୍ଷିଣ ଭାରତର ଫିଲ୍ମ ପ୍ରଡକ୍ସନ କମ୍ପାନୀ ବୈଜୟନ୍ତୀ ମୁଭିଜ ଏହି ହିନ୍ଦୀ ଫିଲ୍ମ ଜରିଆରେ ନିଜର 50 ବର୍ଷ ପୂରଣ କରିବାକୁ ଯାଉଛି । ଏହି 50 ବର୍ଷ ମଧ୍ୟରେ ବୈଜୟନ୍ତୀ ମୁଭିଜ ଭାରତୀୟ ଭାଷାରେ ଅନେକ ଶାନଦାର ଫିଲ୍ମ ନିର୍ମାଣ କରି ତେଲୁଗୁ ସିନେମାକୁ ପୁରା ବିଶ୍ବରେ ସମ୍ମାନ ଦେଇଛି।

ସେହିପରି ବୈଜୟନ୍ତୀ ମୁଭିଜର ସଂସ୍ଥାପକ ଅଶ୍ବିନୀଙ୍କ ପାଇଁ ଏହି ଆଗାମୀ ଫିଲ୍ମ କୌଣସି ସ୍ବପ୍ନଠୁ କମ ନୁହେଁ । ଫିଲ୍ମରେ ଅମିତାଭଙ୍କ ସାମିଲ ହେବାକୁ ନେଇ ସେ କହିଛନ୍ତି, ‘ଏହି କଥା ସେହି ସମୟର ଯେବେ ମୁଁ ଓ ଏନଟିଆର ସାର ଏକାଠି ଫିଲ୍ମ ଦେଖିବାକୁ ଯାଉଥିଲୁ । ଅନେକଥର ଆମେ ଦୁହେଁ ଅମିତାଭଙ୍କ ସୋଲେ ଫିଲ୍ମ ଦେଖିଥିଲୁ । ଏହି ଫିଲ୍ମ ଏନଟିଆରଙ୍କ ରାମକ୍ରିଷ୍ଣା ଥିଏଟରରେ ଏକ ବର୍ଷ ପର୍ଯ୍ୟନ୍ତ ଚାଲିଥିଲା । ଏତେ ବର୍ଷ ପରେ ଭାରତୀୟ ସିନେମାର ମହାନାୟକ ଅମିତାଭଙ୍କ ସହ ଏହି ପ୍ରତିଷ୍ଠିତ ଫିଲ୍ମରେ କାମ କରିବା ମୋ ପାଇଁ ସୌଭାଗ୍ୟର କଥା । ମୋ କମ୍ପାନୀ ଏନଟି ରାମାରାଓଙ୍କ ସହ ସିନେମା ଯାତ୍ରା ଆରମ୍ଭ କରିଥିଲା । ଆଉ ମୋ ପ୍ରଡକ୍ସନ ହାଉସର ନାମକରଣ ମଧ୍ୟ ସେ କରିଥିଲେ ।’

ବ୍ୟୁରୋ ରିପୋର୍ଟ, ଇଟିଭି ଭାରତ