ହାଇଦ୍ରାବାଦ:ଦୀର୍ଘ ସମୟ ଧରି ବଲିଉଡରୁ ଦୂରେଇ ରହିଥିବା ଶାହାରୁଖ ଖାନଙ୍କୁ ବଡ଼ ପରଦାରେ ଦେଖିବାକୁ ଅପେକ୍ଷା କରିଛନ୍ତି ପ୍ରଶଂସକ । ରୋମାନ୍ସ କିଙ୍ଗରୁ ଆକ୍ସନ୍ ହିରୋ ଅବତାରରେ ନଜର ଆସିଛନ୍ତି କିଙ୍ଗଖାନ । ଏକ ଭିଡିଓ ସେୟାର କରି ନିଜର ଦମ ଦେଖାଇଛନ୍ତି ଶାହାରୁଖ। ଯଦି ଆପଣ ଭାବୁଛନ୍ତି ଯେ ଏହା ତାଙ୍କର ଏକ ଚଳଚ୍ଚିତ୍ରର ଭିଡିଓ ତେବେ ତାହା ନୁହେଁ, ବାସ୍ତବରେ ଏହା ତାଙ୍କର ଏକ ବିଜ୍ଞାପନର ଭିଡିଓ ।
ଯାହା ଶାହାରୁଖଙ୍କ ସୋସିଆଲ ମିଡିଆ ପୃଷ୍ଠାରୁ ସେୟାର କରାଯାଇଛି । ଲମ୍ବା କେଶ ସହିତ ତାଙ୍କର ଲୁକ ସମ୍ପୂର୍ଣ୍ଣ ଭିନ୍ନ ରହିଛି । ଫିଲ୍ମ 'ପଠାନ'ରେ ସେ ଏହି ଲୁକରେ ଅଭିନୟ କରିଛନ୍ତି । ବିଜ୍ଞାପନରେ ଶାହାରୁଖ ଖାନ କଳା ସୁଟରେ ନଜର ଆସିଛନ୍ତି। ଭିଡିଓ ଆରମ୍ଭରେ ଶାହାରୁଖ ସିନେମା ହଲରେ ନିଜ ଫିଲ୍ମ ଦେଖୁଛନ୍ତି।
ଆଗକୁ ଫିଲ୍ମର ସିନରେ ଦେଖିବାକୁ ମିଳୁଛି ଯେଉଁଥିରେ ସେ ଟ୍ରେନ ଉପରେ ଏବଂ ଟ୍ରେନ ଭିତରେ ଖଳନାୟକ ସହ ଲଢୁଛନ୍ତି। ଭିଡିଓ ସେୟାର କରି ଶାହାରୁଖ କ୍ୟାପସନରେ ଲେଖିଛନ୍ତି, 'ନାଁ ତ ଶୁଣିଥିବ ମୋ ଜାନ୍ ? ଏହାକୁ ସଫ୍ଟ କୁହନ୍ତିନି, କହନ୍ତି ତୁଫାନ' ।
ଶାହାରୁଖଙ୍କୁ ଏହି ଲୁକରେ ଦେଖି ତାଙ୍କ ପ୍ରଶଂସକମାନେ ଉତ୍ସାହିତ ଅଛନ୍ତି । ଜଣେ ୟୁଜର ଲେଖିଛନ୍ତି - 'ଏବେ ପଠାନ୍ ବି ଦୟାକରି ଘୋଷଣା କରିଦିଅନ୍ତୁ, ଖାନ୍ ସାହବ।' ଆଉ ଜଣେ କହିଛନ୍ତି, 'ପଠାନ୍ ଲୁକ୍ସ।' ଶାହାରୁଖଙ୍କ ଜଣେ ପ୍ରଶଂସକ ଲେଖିଛନ୍ତି, 'କେହି ଜଣେ ଅଗ୍ନିଶମ ବାହିନୀକୁ ଡାକନ୍ତୁ।' ଆଉ ଜଣେ ୟୁଜର ଲେଖିଛନ୍ତି, ଆରେ ଓ୍ବାହ, କିଙ୍ଗ ଇଜ ବ୍ୟାକ୍। ଆଉ ଜଣେ ୟୁଜର ଲେଖିଛନ୍ତି, କଳ୍ପନା କରୁଛି ଯେ ସେ ପଠାନରେ କିପରି ଦେଖାଯାଉଥିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
