ଫିଲ୍ମଫେୟର ଆୱାର୍ଡ୍ସକୁ ଫାଲତୁ କହିଲେ ସଲମାନ

କୌଣସି ନା କୌଣସି କାରଣରୁ ଭାଇଜାନ ସଲମାନ ଖାନ ସବୁବେଳେ ଚର୍ଚ୍ଚାରେ ଆସିଥାଆନ୍ତି। କେବେ ନିଜ ବୟାନ ପାଇଁ କେବେ ନିଜ ସୋସିଆଲ ମିଡିଆ ଭିଡିଓକୁ ନେଇ ସବୁ ମହଲରେ ତାଙ୍କ ଆଲୋଚନା ହୋଇଥାଏ। ଏବେ ଏମିତି ହିଁ କିଛି ଦେଖିବାକୁ ମିଳୁଛି। ଏକ ପୁରୁଣା ଭିଡିଓକୁ ନେଇ ପୁଣି ଚର୍ଚ୍ଚାରେ ସଲମାନ।

ମୁମ୍ବାଇ: 65ତମ ଫିଲ୍ମଫେୟାର ଆୱାର୍ଡ ଶୋ ଗତ 15,16 ତାରିଖରେ ଗୌୱାହାଟିରେ ଆୟୋଜିତ ହୋଇଥିଲା। ଯେଉଁଥିରେ ଅନେକ ଷ୍ଟାର୍ସ ପୁରସ୍କୃତ ହୋଇଥିଲେ । ଏଥର ଆୱାର୍ଡ ସମାରୋହରେ ‘ଗଲି ବୟ’ ଫିଲ୍ମର ଯାଦୁ ଦେଖିବାକୁ ମିଳିଥିଲା। ଏହି ଫିଲ୍ମକୁ ଭିନ୍ନ ଭିନ୍ନ ଶ୍ରେଣୀରେ 10ଟି ପୁରସ୍କାରରେ ପୁରସ୍କୃତ କରାଯାଇଥିଲା।

ରଣବୀର ସିଂଙ୍କୁ ସର୍ବଶ୍ରେଷ୍ଠ ଅଭିନେତା ପୁରସ୍କାର ମିଳିଥିବା ବେଳେ ଆଲିୟା ଭଟ୍ଟଙ୍କୁ ସର୍ବଶ୍ରେଷ୍ଠ ଅଭିନେତ୍ରୀ ପୁରସ୍କାର ଦିଆଯାଇଥିଲା। ଇତିମଧ୍ୟରେ ସୁପରଷ୍ଟାର ସଲମାନ ଖାନଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି । ଭିଡିଓଟି ଏବେ ଚର୍ଚ୍ଚାରେ ଆସିବାର କାରଣ ହେଲା ଯେ ସେ ଫିଲ୍ମଫେୟାର ପୁରସ୍କାରକୁ ନେଇ ଏମିତି କଥା କହିଥଲେ ଯାହାକୁ କେହି ବିଶ୍ବାସ କରିପାରିବେ ନାହିଁ।

ଭାଇରାଲ ହେଉଥିବା ସଲମାନଙ୍କ ଏହି ଭିଡିଓଟି ପୁରୁଣା ଭିଡିଓ । ଯାହା ବର୍ତ୍ତମାନ ଫ୍ୟାନକ୍ଲବ ପେଜରେ ସେୟାର କରାଯାଇଛି। ଭିଡିଓରେ ସେ ଫିଲ୍ମଫେୟାର ଆୱାର୍ଡ ଉପରେ ବିବାଦୀୟ ଟିପ୍ପଣୀ କରୁଥିବାର ନଜର ଆସୁଛନ୍ତି ।

ଯାହାଙ୍କୁ ନିଜ ଉପରେ ବିଶ୍ବାସ ନଥାଏ, ସେହିମାନେ ପୁରସ୍କାର ଆଣିବାକୁ ଯାଉଛନ୍ତି । ସେ ଫିଲ୍ମଫେୟାର କିମ୍ବା ଏପରି ବେକାରିଆ ପୁରସ୍କାର ଆଣିବାକୁ କେବେ ଯିବେ ନାହିଁ । ଯଦି ନ୍ୟାସନାଲ ଆୱାର୍ଡ ମିଳିବ ତେବେ ତାହା ଗର୍ବର କଥା ହେବ । ନ୍ୟାସନାଲ ଆୱାର୍ଡ ପାଇଁ ଯିବେ ଏବଂ ପୁରସ୍କାର ଗ୍ରହଣ କରିବେ ବୋଲି ଭିଡିଓରେ ସେ କହିଛନ୍ତି ।