ରିଲିଜ ହେଲା 'ନୋଟବୁକ'ର ପ୍ରଥମ ରୋମାଣ୍ଟିକ ଗୀତ

ଚର୍ଚ୍ଚା ଏବେ ଫିଲ୍ମ 'ନୋଟବୁକ' । ଫିଲ୍ମରେ ନଜର ଆସିବେ ଦୁଇ ନୂଆ ଚେହେରା ପ୍ରନୂତନ ବହଲ ଓ ଜାହୀର ଇକବାଲ । ଇତିମଧ୍ୟରେ ରିଲିଜ ହୋଇଯାଇଛି ଫିଲ୍ମର ପ୍ରଥମ ରୋମାଣ୍ଟିକ ଗୀତ । ସଲମାନ ଖାନଙ୍କ ପ୍ରଡକ୍ସନରେ ତିଆରି ହୋଇଛି ଫିଲ୍ମ ନୋଟବୁକ ।

ହାଇଦ୍ରାବାଦ: ବଲିଉର ଦବଙ୍ଗ ଖାନ ସଲମାନ ଆଜିକାଲି 'ନୋଟବୁକ' ଫିଲ୍ମର ପ୍ରମୋସନରେ ଜୋରୋସୋରରେ ଲାଗିପଡିଛନ୍ତି । ନିଜ ବ୍ୟାନରରେ ତିଆରି କରିଥିବା 'ନୋଟବୁକ'ରେ ପୁଣିଥରେ ସେ ଦୁଇ ନୂଆ ଚେହେରାକୁ ବଲିଉଡରେ ସାମିଲ କରିବାକୁ ଯାଉଛନ୍ତି । ନିକଟରେ ଫିଲ୍ମର ଟ୍ରେଲର ରିଲିଜ ହୋଇଥିଲା । ଯାହାକୁ ଦର୍ଶକ ଖୁବ୍ ପସନ୍ଦ ମଧ୍ୟ କରିଥିଲେ । ଏବେ ଫିଲ୍ମର ପ୍ରଥମ ଗୀତ 'ନେହିଂ ଲଗଦା' ଗୀତ ରିଲିଜ ହୋଇଯାଇଛି ।

ପ୍ରନୂତନ ବହଲ ଓ ଜାହୀର ଇକବାଲଙ୍କ ଏହି ଗୀତ ରୋମାଣ୍ଟିକ ଅନ୍ଦାଜରେ ଉପସ୍ଥାପନ କରାଯାଇଛି । ଗୀତରେ ଆପଣଙ୍କୁ କାଶ୍ମୀରର ସୁନ୍ଦରତା ଦେଖିବାକୁ ମିଳିବ । ଗୀତଟିକୁ ବିଶାଲ ମିଶ୍ରା ଓ ଆଶିଷ କୌର ଗାଇଥିବା ବେଳେ ଲିରିକ୍ସ ଲେଖିଛନ୍ତି ଅକ୍ଷୟ ତ୍ରିପାଠୀ ।

ଗୀତଟିର ଭିଡିଓକୁ ଟି-ସିରିଜ ନିଜ ଅଫିସିଆଲ ୟୁଟ୍ୟୁବ ଆକାଉଣ୍ଟରେ ଅପଲୋଡ କରିଛି । ଯାହାକୁ ମାତ୍ର ଗୋଟିଏ ଘଣ୍ଟା ମଧ୍ୟରେ ପାଖାପାଖି 1 ଲକ୍ଷରୁ ଅଧିକ ଥର ଦେଖାସରିଲାଣି । ଫିଲ୍ମର ଟ୍ରେଲରେ ଦୁଇ ଅଜଣା ପୁଅ ଝିଅର ପ୍ରେମ କାହାଣୀ ଦେଖିବାକୁ ମିଳିଥିଲା । ଫିଲ୍ମର ନିର୍ଦ୍ଦେଶନା ଭାର ସମ୍ଭାଳିଛନ୍ତି ନୀତିନ କକ୍କଡ ଏବଂ ଫିଲ୍ମର ପ୍ରଯୋଜନା ତୁଲାଇଛି ସଲମାନଙ୍କ ପ୍ରଡକ୍ସନ ହାଉସ । ନୂଆ ଅନ୍ଦାଜ ଏବଂ ନୂଆ କାହାଣୀରେ ତିଆରି ହୋଇଥିବା 'ନୋଟବୁକ' ମାର୍ଚ୍ଚ 29ରେ ରିଲିଜ ହେବାକୁ ଯାଉଛି ।