ରିଲିଜ ହେଲା ‘ବଟଲା ହାଉସ’ର ଟ୍ରେଲର

ରିଲିଜ ହୋଇଛି ସତ୍ୟ ଘଟଣା ଉପରେ ଆଧାରିତ ଫିଲ୍ମ ‘ବଟଲା ହାଉସ’ର ଟ୍ରେଲର । ଟ୍ରେଲରରେ ଜନ୍ ଙ୍କୁ ପୋଲିସ ଅଫିସର ଚରିତ୍ରରେ ଦେଖିବାକୁ ମିଳିବ ।

ହାଇଦ୍ରାବାଦ: ‘ସତ୍ୟମେବ ଜୟତେ’ରେ ଜବରଦସ୍ତ ଅଭିନୟରେ ଦର୍ଶକଙ୍କ ମନ କିଣିଥିବା ଜନ୍ ଆବ୍ରାହାମ ପୁଣି ଏକ ସତ୍ୟ ଘଟଣା ଉପରେ ଆଧାରିତ ଫିଲ୍ମ ‘ବଟଲା ହାଉସ’ରେ ନଜର ଆସିଛନ୍ତି । ନିକଟରେ ଫିଲ୍ମର ଟ୍ରେଲର ରିଲିଜ ହୋଇଛି । 2 ମିନିଟ 55 ସେକେଣ୍ଡର ଟ୍ରେଲରରେ ‘ବଟଲା ହାଉସ’ର ଥ୍ରୀଲର ଓ ସସପେନ୍ସରେ ଭରପୁର କାହାଣୀ ବିଷୟରେ ସଙ୍କେତ ଦିଆଯାଇଛି ।

ଜନ୍ ଙ୍କୁ ଫିଲ୍ମରେ ଜଣେ ପୋଲିସ ଅଫିସର ବେଶରେ ଦେଖିବାକୁ ମିଳିବ । ବୁଲେଟ ପ୍ରୁଫ୍ ଜ୍ୟାକେଟ ପିନ୍ଧି ନିଜ ଟିମ ସହ ଗୁଳି ବର୍ଷଣ କରୁଥିବାର ଦେଖିବାକୁ ମିଳିଛି । ଫିଲ୍ମର ଟ୍ୟାଗ ଲାଇନରେ ଶୁଣିବାକୁ ମିଳିଥିଲା, ‘ କାହାଣୀ ସତ୍ୟ ଘଟଣା ଉପରେ ଆଧାରିତ ଯାହା ସତ୍ୟ ହିଁ ନୁହେଁ । ’

କାହାଣୀ ଅନୁସାରେ ଏନକାଉଣ୍ଟର ପରେ ଅନେକ ବିବାଦ ଦେଖିବାକୁ ମିଳିଥିଲା ମାତ୍ର ସମସ୍ତ ବିବାଦ ପରେ ମଧ୍ୟ ଜନ୍ ସତ୍ୟ ବିଷୟରେ ଜାଣିବାକୁ ଚେଷ୍ଟା କରିଥିଲେ ଓ ଶେଷରେ ଗୋଲ୍ଡ ମେଡାଲରେ ପୁରସ୍କୃତ କରାଯାଉଥିବାର ଟ୍ରେଲରରେ ଦେଖିବାକୁ ମିଳିଛି । ଫିଲ୍ମରେ ଜନ୍, ‘ବଟଲାହାଉସ’ଏନକାଉଣ୍ଟରରେ ସାମିଲ ଥିବା ମୁଖ୍ୟ ସଞ୍ଜିବ କୁମାରଙ୍କ ଚରିତ୍ରରେ ନଜର ଆସିବେ ।

ପ୍ରକାଶ ଥାଉକି, ବଟଲା ହାଉସ ଏନକାଉଣ୍ଟର 2008ରେ ହୋଇଥିଲା । ଫିଲ୍ମରେ ଜନ୍ ଙ୍କ ସହ ମୃଣାଲ ଠାକୁର, ନୋରା ଫତେହି ନଜର ଆସିବେ । ଫିଲ୍ମର ନିର୍ଦ୍ଦେଶନା ଦେଉଛନ୍ତି ନିଖିଲ ଆଡଭାନି ଓ କାହାଣୀ ଲେଖିଛନ୍ତି ରିତେଶ ଶାହା । ତେବେ ଫିଲ୍ମଟି ଅଗଷ୍ଟ 15ରେ ରିଲିଜ କରାଯିବ ।