କୃଷକ ଆନ୍ଦୋଳନ ଉପରେ ଟ୍ବିଟ କରି ଫସିଲେ କୁଇନ

ବିବାଦ ଓ କଙ୍ଗନା ସବୁବେଳେ ପରସ୍ପର ସହ ଜଡିତ । ଏବେ ପୁଣି ତାଙ୍କ ବିରୋଧରେ ଏକ ନୋଟିସ ଜାରି କରାଯାଇଛି । ନିକଟରେ କୃଷକ ଆନ୍ଦୋଳନରେ କରିଥିବା ବିବାଦୀୟ ଟ୍ବିଟ ପାଇଁ ଫସିଲେ ସେ ।

ମୁମ୍ବାଇ: ବଢିଲା କଣ୍ଟ୍ରୋଭର୍ସି କୁଇନ କଙ୍ଗନା ରଣାୱତଙ୍କ ସମସ୍ୟା । ନିକଟରେ କୃଷକ ଆନ୍ଦୋଳନରେ କରିଥିବା ଅପମାନଜନକ ଟ୍ବିଟ ପାଇଁ ସମସ୍ୟା ଘେରରେ ସେ । କୃଷି ନିୟମ ବିରୁଦ୍ଧରେ କୃଷକ ଆନ୍ଦୋଳନ ବିଷୟରେ କଙ୍ଗନା ଟ୍ବିଟ କରିଥିଲେ । ଯେଉଁଥିରେ ସେ ଜଣେ ମହିଳା ଆନ୍ଦୋଳନକାରୀଙ୍କୁ ଶାହିନବାଗର ଜେଜେମା ବିଲକିସ୍ ବାନୋ ବୋଲି ବର୍ଣ୍ଣନା କରିଥିଲେ ।

ଏହି ମାମଲାରେ ବର୍ତ୍ତମାନ ପଞ୍ଜାବ ଜିରାକପୁରର ଜଣେ ଆଇନଜୀବୀ କଙ୍ଗନାଙ୍କୁ ଆଇନଗତ ନୋଟିସ ଜାରି କରିଛନ୍ତି ଏବଂ ଏହି ବିବାଦୀୟ ଟ୍ବିଟ ପାଇଁ କ୍ଷମା ମାଗିବାକୁ କହିଛନ୍ତି ।

ପ୍ରକାଶ ଥାଉକି ଏହା ବ୍ୟତୀତ କଙ୍ଗନା ଓ ତାଙ୍କ ଭଉଣୀ ରଙ୍ଗୋଲୀଙ୍କ ଉପରେ ବାନ୍ଦ୍ରା ପୋଲିସ ଷ୍ଟେସନରେ ଏକ ମାମଲା ଚାଲିଛି । ବାନ୍ଦ୍ରା ପୋଲିସ ତିନିଥର ଅଭିନେତ୍ରୀଙ୍କୁ ସମନ ପଠାଇ ସାରିଲାଣି । ହେଲେ ବ୍ୟକ୍ତିଗତ ସମସ୍ୟା କହି ଏଯାବତ ନିଜ ବୟାନ ଦେବାକୁ ସେ ପୋଲିସ ଷ୍ଟେସନରେ ପହଞ୍ଚିନାହାଁନ୍ତି । କିଛି ଦିନ ପୂର୍ବରୁ ତାଙ୍କ ଓକିଲଙ୍କ ଦ୍ବାରା ଆଉ କିଛି ଦିନ ସମୟ ମଗାଯାଇଥିଲା ଉପସ୍ଥିତ ହେବା ପାଇଁ ।