ହାଇଦ୍ରାବାଦ:ସାଉଥ ସୁପର ଷ୍ଟାର ତଥା ଚର୍ଚ୍ଚିତ ଫିଲ୍ମ 'ବାହୁବଲୀ' ଅଭିନେତା ପ୍ରଭାସଙ୍କ ସ୍ୱାସ୍ଥ୍ୟାବସ୍ଥା ଖରାପ ଅଛି । ପ୍ରଭାସ ବର୍ତ୍ତମାନ ସ୍ପେନରେ ଅଛନ୍ତି ଓ ତାଙ୍କର ଚିକିତ୍ସା ଚାଲିଛି ବୋଲି ଜଣାପଡିଛି । ବାର୍ସିଲୋନାରେ ତାଙ୍କର ଅସ୍ତ୍ରୋପଚାର କରାଯାଇଥିବା ଜଣାପଡିଛି । ଅପରେସନ୍ ହେବା ପରେ ପ୍ରଭାସଙ୍କୁ ପରବର୍ତ୍ତୀ ଯାଞ୍ଚ ପର୍ଯ୍ୟନ୍ତ ସମ୍ପୂର୍ଣ୍ଣ ବିଶ୍ରାମ ନେବାକୁ ଡାକ୍ତର କହିଛନ୍ତି ।
ନିକଟରେ ପ୍ରଭାସଙ୍କ ଅଭିନୀତ ଫିଲ୍ମ 'ରାଧେ ଶ୍ୟାମ' ରିଲିଜ ହୋଇସାରିଛି। ତେବେ ଫିଲ୍ମ ଦର୍ଶକଙ୍କୁ ସେତେଟା ପସନ୍ଦ ଆସୁନଥିବା ଦେଖାଯାଇଛି । ପ୍ରଥମ ଦିନର ଆୟକୁ ଦେଖି ଫିଲ୍ମ ‘ରାଧେ ଶ୍ୟାମ’ ବକ୍ସ ଅଫିସରେ ଫେଲ୍ ମାରିଥିବା କୁହାଯାଉଛି । ୩୫୦ କୋଟି ବଜେଟରେ ନିର୍ମିତ ଏହି ଚଳଚ୍ଚିତ୍ର ପ୍ରଥମ ଦିନରେ ଫେଲ୍ ମାରିବ ବୋଲି କେହି କଳ୍ପନା କରି ନଥିବେ। କିଛି ମାସ ପୂର୍ବେ ପ୍ରଭାସଙ୍କ ଆଗାମୀ ଚଳଚ୍ଚିତ୍ର ସାଲାର ସୁଟିଂ ସମୟରେ ପ୍ରଭାସ ଆହତ ହୋଇଥିଲେ।
'ରାଧେ ଶ୍ୟାମ'କୁ ଦର୍ଶକଙ୍କ ପ୍ରତିକ୍ରିୟା ସ୍ପଷ୍ଟ ହେବା ପରେ ପ୍ରଭାସଙ୍କ ଅଧିକାଂଶ ପ୍ରଶଂସକଙ୍କୁ ଲାଗିଥିଲା କି, ସେ ଦୂରେଇ ରହିବାକୁ ଚାହୁଁଛନ୍ତି। କିନ୍ତୁ, ପ୍ରଭାସଙ୍କ ଅସ୍ତ୍ରୋପଚାର ବିଷୟରେ ଜାଣିବା ପରେ ତାଙ୍କ ପ୍ରଶଂସକମାନେ ତାଙ୍କର ଶୀଘ୍ର ଆରୋଗ୍ୟ କାମନା କରିଛନ୍ତି।