ମୁମ୍ବାଇ: ସାମ୍ନାକୁ ଆସିଲା ଗୁଡନ୍ୟୁଜ । ଦେଶୀ ଗାର୍ଲ ପ୍ରିୟଙ୍କା ଚୋପ୍ରାଙ୍କ ଫିଲ୍ମ ‘ଦ ହ୍ବାଇଟ ଟାଇଗର’ ପ୍ରଥମେ ବାଫ୍ଟାରେ ଦୌଡରେ ସାମିଲ ହୋଇଥିଲା । ଆଉ ଏବେ ଓସ୍କାର ପୁରସ୍କାରରେ ନାମାଙ୍କନ ହୋଇଛି । ଯାହାକୁ ନେଇ ଫିଲ୍ମର ଷ୍ଟାରକାଷ୍ଟ ରାଜକୁମାର ରାଓ ଓ ଆଦର୍ଶ ଗୌରବଙ୍କ ଖୁସି ନକହିଲେ ସରେ ।
ସୋମବାର 93ତମ ଏକାଡେମୀ ପୁରସ୍କାରର ନାମାଙ୍କନ ତାଲିକା ପ୍ରକାଶ ପାଇଛି । ଯେଉଁଥିରେ ସ୍ଥାନ ପାଇଛି ‘ଦ ହ୍ବାଇଟ ଟାଇଗର’ । ଫିଲ୍ମଟି ଆଡପ୍ଟେଡ୍ ସ୍କ୍ରିନପ୍ଲେ ବର୍ଗରେ ମନୋନୀତ ହୋଇଛି ।
ମୁଖ୍ୟ କଥା ହେଲା ଯେ ଫିଲ୍ମର ଅଭିନେତ୍ରୀ ପ୍ରିୟଙ୍କା ଏବଂ ତାଙ୍କ ସ୍ବାମୀ ନିକ ଜୋନସ ଏହି ପୁରସ୍କାର ନାମାଙ୍କନ ଘୋଷଣା କରିବେ । ଫିଲ୍ମ ସାମିଲ ହେବା ଅବସରରେ ପ୍ରିୟଙ୍କା ଏହାର ସୂଚନା ଟ୍ବିଟରରେ ସମସ୍ତଙ୍କୁ ଦେଇଛନ୍ତି । ସେ ଏକ ପୋଷ୍ଟ କରି ଲେଖିଛନ୍ତି, ‘ଆମେ ଏବେ ଓସ୍କାର ପାଇଁ ମନୋନୀତ ହେଲୁ। ଅଭିନନ୍ଦନ ରମିନ ଏବଂ ଦ ହ୍ବାଇଟ ଟାଇଗରର ପୁରା ଟିମକୁ । ନାମାଙ୍କନ ଘୋଷଣା କରିବାକୁ ନେଇ ମୁଁ ଗର୍ବିତ ।’
ପ୍ରକାଶ ଥାଉକି ‘ଦ ହ୍ବାଇଟ ଟାଇଗର’ ଫିଲ୍ମର କାହାଣୀ ଧନୀ ଗରିବ ଭେଦଭାବକୁ ନେଇ ଆଧାରିତ । କିପରି ଜଣେ ଗରିବ ସବୁବେଳେ ଧନୀ ହେବାକୁ ସ୍ବପ୍ନ ଦେଖେ ସେନେଇ ପର୍ଯ୍ୟବେଶିତ ଫିଲ୍ମର କାହାଣୀ ।
