ଓଟିଟି ପ୍ଲାଟଫର୍ମ ଜି5ରେ ଶୁକ୍ରବାର ରିଲିଜ ହେବ ‘ଖାଲି ପିଲି’

ଆଉ କିଛି ଘଣ୍ଟା ପରେ ଡିଜିଟାଲ ପ୍ଲାଟଫର୍ମରେ ଚର୍ଚ୍ଚିତ ଫିଲ୍ମ ‘ଖାଲି ପିଲି’ ଦେଖିବେ ଦର୍ଶକ । ପରଦାରେ ରୋମାନ୍ସ କରିବେ ଈଶାନଙ୍କ ସହ ଅନନ୍ୟା ।

ମୁମ୍ବାଇ: ଈଶାନ ଖଟ୍ଟର ଓ ଅନନ୍ୟା ପାଣ୍ଡେଙ୍କ ଅଭିନୀତ ଫିଲ୍ମ ‘ଖାଲି ପିଲି’ ଶୁକ୍ରବାର ଜି5ରେ ରିଲିଜ ହେବାକୁ ପ୍ରସ୍ତୁତ । ‘ଖାଲି ପିଲି’ ଏକ ରୋମାଣ୍ଟିକ ଡ୍ରାମା ଫିଲ୍ମ ଯାହାର ନିର୍ଦ୍ଦେଶନା କରିଛନ୍ତି ମକବୁଲ ଖାନ । ସେହିପରି ଅଲ୍ଲୀ ଅବ୍ବାସ ଜଫର ଓ ହିମାଂଶୁ ମେହରାଙ୍କ ଦ୍ବାରା ନିର୍ମିତ ଫିଲ୍ମ । ରୋମାଣ୍ଟିକ କପଲ ରୂପେ ଈଶାନ ଓ ଅନନ୍ୟା ନଜର ଆସିବାକୁ ଯାଉଥିବା ବେଳେ ଜୟଦୀପ ଅହଲାୱତ ଭିଲେନ ଭୂମିକାରେ ଦେଖାଯିବେ । ବର୍ତ୍ତମାନ ଫିଲ୍ମକୁ ନେଇ ଏକ୍ସାଇଟେଡ ଦର୍ଶକ।

ଫିଲ୍ମ ରିଲିଜ ସୂଚନା ଦେଇ ଅନନ୍ୟା ଇନଷ୍ଟାଗ୍ରାମରେ ଲେଖିଛନ୍ତି, ‘ମୁଁ ବହୁତ ଉତ୍ସାହିତ ଅଛି ଯେ ଖାଲି ପିଲି ଜି 5ରେ ରିଲିଜ ହେବାକୁ ନେଇ । ଆଉ 190ରୁ ଅଧିକ ଦେଶରେ ଦର୍ଶକ ଏହି ଫିଲ୍ମ ଦେଖିପାରିବେ । ଯାହା ମୋ ପାଇଁ ରୋମାଞ୍ଚଭରା । ମୁଁ ଆଶା କରୁଛି ଦର୍ଶକଙ୍କୁ ମୋ ଭୂମିକା ପସନ୍ଦ ଆସିବ କାରଣ ଏହା ମୋ ପୂର୍ବରୁ ଭୂମିକା ଠୁ ସମ୍ପୂର୍ଣ୍ଣ ଭିନ୍ନ । ଏହା ପ୍ରଶଂସକଙ୍କ ପାଇଁ ଦୀପାବଳି ଉପହାର । ଘରେ ପରିବାର ସହ ବସି ଏହି ଫିଲ୍ମର ମଜା ଉଠାଇବେ ସମସ୍ତେ ।’

ସେପଟେ ଈଶାନ ମଧ୍ୟ କହିଛନ୍ତି, ‘ଖାଲି ପିଲି ଏକ ଏଣ୍ଟରଟେନର ଫିଲ୍ମ ଆଉ ମୁଁ ଖୁସି ଅଛି ଯେ ଓଟିଟି ରିଲିଜ ମାଧ୍ୟମରେ ଅଧିକ ଦର୍ଶକ ଏହାକୁ ଦେଖିପାରିବେ । ଫିଲ୍ମ ସୁଟିଂ କରିବା ବହୁତ ମଜାଦାର ଥିଲା । ଆଉ ଆମ ଉର୍ଜା ସ୍କ୍ରିନରେ ମଧ୍ୟ ଦେଖିବାକୁ ମିଳିବ ।’