ମୁମ୍ବାଇ:ପୁଣି ବିବାହ କଲେ ଅଭିନେତା ତଥା ରାଜନେତା ପ୍ରକାଶ ରାଜ । ୧୧ତମ ବିବାହ ବାର୍ଷିକୀରେ ଆଉ ଥରେ ହାତକୁ ଦି ହାତ ହୋଇଛନ୍ତି ସାଉଥ ସୁପରଷ୍ଟାର ପ୍ରକାଶ ରାଜ । ଅନ୍ୟ ଯୁବତୀଙ୍କୁ ନୁହେଁ ବରଂ ତାଙ୍କ ପତ୍ନୀ ଥିବା ପୋନି ବର୍ମାଙ୍କୁ ଆଉ ଥରେ ବିବାହ କରିଛନ୍ତି ।
ଗତକାଲି(ମଙ୍ଗଳବାର) ପ୍ରକାଶ ଓ ପୋନିଙ୍କ ୧୧ତମ ବିବାହ ବାର୍ଷିକୀ ଥିଲା । ଏହି ଅବସରରେ ପ୍ରକାଶ ପୁଣି ବୈଦିକ ରୀତିନୀତିରେ ପୋନିଙ୍କୁ ବିବାହ କରିଛନ୍ତି । ବିବାହର ଫଟୋ ଇନଷ୍ଟାଗ୍ରାମ ହ୍ୟାଣ୍ଡେଲରେ ପୋଷ୍ଟ କରି ପୁଣି ବିବାହ କରିଥିବା ନେଇ ଜଣାଇଥିଲେ । ସେ କହିଥିଲେ କାରଣ ଆମ ପୁଅ ବେଦାନ୍ତ ଆମ ବିବାହ ଦେଖିବାକୁ ଚାହୁଁଥିଲା ।
ପ୍ରକାଶ ସେୟାର କରିଥିବା ଫଟୋରେ ପ୍ରକାଶଙ୍କ ପୁଅ ବେଦାନ୍ତ ତାଙ୍କ ଝିଅ ମେଘନା ଏବଂ ପୂଜାଙ୍କୁ ଦେଖିବାକୁ ମିଳିଥିଲା । 2009ରେ ପ୍ରକାଶ ରାଜ ପ୍ରଥମ ପତ୍ନୀ ଲଳିଥାଙ୍କଠାରୁ ଅଲଗା ହୋଇଥିଲେ । ଏହା ପରେ ୨୦୧୦ରେ ସେ ପୋନିଙ୍କୁ ବିବାହ କରିଥିଲେ । ୧୧ତମ ବିବାହ ବାର୍ଷିକୀରେ ଶୁଭେଚ୍ଛା ଜଣାଇ ମୋର ପତ୍ନୀ ହେବା ସହ ଜଣେ ଭଲ ବନ୍ଧୁ ହୋଇ ମୋ ଜୀବନର ସାଥୀ ହୋଇଥିବା ନେଇ ପୋନିଙ୍କୁ ଧନ୍ୟବାଦ ଦେଇଛନ୍ତି ପ୍ରକାଶ ରାଜ ।
ସାଉଥର ନାମିଦାମୀ ଅଭିନେତାଙ୍କ ମଧ୍ୟରୁ ଜଣେ ହେଉଛନ୍ତି ପ୍ରକାଶ ରାଜ । ସେ ତାଙ୍କ କ୍ୟାରିଅରରେ ଅନେକ ହିଟ୍ ଫିଲ୍ମ ଦେଇଛନ୍ତି । ଏଥିସହ ତାଙ୍କର ଦମଦାର ଅଭିନୟ ବଳରେ ସେ ଜାତୀୟ ପୁରସ୍କାର ମଧ୍ୟ ଜିତିଛନ୍ତି ।
ବ୍ୟୁରୋ ରିପୋର୍ଟ,ଇଟିଭି ଭାରତ
