ହାଇଦ୍ରାବାଦ:ବଲିଉଡର 'ପଙ୍ଗା କୁଇନ' କଙ୍ଗନା ରଣାଓ୍ବତ ଏଥର ବଡ ପରଦାରେ ନୁହେଁ, ବରଂ ଛୋଟ ପରଦାରେ ଧମାଲ ମଚାଇବାକୁ ଆସୁଛନ୍ତି । କଙ୍ଗନା ବର୍ତ୍ତମାନ ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ଏକତା କପୁରଙ୍କ ରିଆଲିଟି ଶୋ 'ଲକ୍ ଅପ୍'ର ହୋଷ୍ଟ କରୁଥିବା ଦେଖିବାକୁ ମିଳିବ । ଶୋ ଆରମ୍ଭ ହେବା ପୂର୍ବରୁ କଙ୍ଗନା ଦିଲ୍ଲୀର ବଙ୍ଗଳା ସାହିବ ଗୁରୁଦ୍ବାରରେ ପହଞ୍ଚି ଶୋ’ର ଟ୍ରେଲର ରିଲିଜ କରିଥିଲେ। ଏବେ ଶୋ’ର ପ୍ରଥମ ପ୍ରତିଯୋଗୀଙ୍କ ଚେହେରା ସାମ୍ନାକୁ ଆସିଛି ।
କଙ୍ଗନାଙ୍କ ସୋ ଲକ୍ ଅପ୍ ରେ ନିଶା ରାୱଲ୍ ପ୍ରଥମ ଏଣ୍ଟ୍ରି ପାଇଥିଲେ । ନିଶା ରାୱଲ ଜଣେ ଟିଭି ଅଭିନେତ୍ରୀ ଏବଂ ସେ ଏକ ବିବାଦୀୟ ସେଲିବ୍ରିଟି ମଧ୍ୟ ଅଟନ୍ତି । ଉଲ୍ଲେଖନୀୟ ଯେ, ନିଶା ଟିଭିର ଚର୍ଚ୍ଚିତ ସିରିଏଲ 'ୟେ ରିସ୍ତା କ୍ୟା କେହଲାତା ହୈ' (2012) ର ମୁଖ୍ୟ ଅଭିନେତା କରଣ ମେହରାଙ୍କୁ ବିବାହ କରିଥିଲେ ଏବଂ ଉଭୟ 2021 ମସିହାରେ ଅଲଗା ହୋଇଥିଲେ । ପାରିବାରିକ ହିଂସା ସମେତ ନିଶା କରଣଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲେ। ଉଭୟଙ୍କ ଝଗଡା ମଧ୍ୟ ସର୍ବସାଧାରଣକୁ ଆସିଥିଲା।