ଇଶାନ-ତବୁଙ୍କ କିସ୍ ସିନ୍ ବିବାଦ: 2 ନେଟଫ୍ଲିକ୍ସ ଅଧିକାରୀଙ୍କ ବିରୋଧରେ ମାମଲା

ମୀରା ନାୟରଙ୍କ ୱେବ ସିରିଜ୍ ‘ଏ ସ୍ବିଟେବୁଲ୍ ବୟ’କୁ ନେଇ ବିବାଦ । ସିରିଜର ଏକ କିସ୍ ସିନକୁ ନେଇ ଉଠିଛି ଆପତ୍ତି । ଅଧିକ ପଢନ୍ତୁ...

ନୂଆଦିଲ୍ଲୀ:ବଢିଚାଲିଥି ନେଟଫ୍ଲିକ୍ସର ପପୁଲାର ସିରିଜ ‘ଏ ସ୍ବିଟେବୁଲ୍ ବୟ’କୁ ବିବାଦ । ନିକଟରେ ଲଭ ଜିହାଦ ମାମଲାକୁ ଆଧାର କରି ଏହି ସିରିଜ ଉପରେ ସମସ୍ୟା ଦେଖାଦେଇଥିଲା । ସିରିଜର ଏକ କିସ୍ ସିନରୁ ସୃଷ୍ଟି ହୋଇଛି ଏହି ବିବାଦ । ଅଭିନେତା ଈଶାନ ଖଟ୍ଟର ଓ ତବୁଙ୍କ ମଧ୍ୟରେ ପର୍ଯ୍ୟବେଶିତ ହୋଇଥିଲା ଏହି ସିନ୍ । ଯାହା ଉପରେ ଏବେ ମାମଲା ରୁଜୁ ହୋଇଛି । ମଧ୍ୟପ୍ରଦେଶ ଗୃହମନ୍ତ୍ରୀ ନରୋତ୍ତମ ମିଶ୍ର ଦୁଇ ଜଣ ନେଟଫ୍ଲିକ୍ସ ଅଧିକାରୀଙ୍କ ବିରୋଧରେ ମଧ୍ୟପ୍ରଦେଶରେ ଏକ ଏଫଆଇଆର ଦାଏର କରିଛନ୍ତି ।

ଗୌରବ ତିୱାରୀଙ୍କ ଦ୍ବାରା ଦାଖଲ କରାଯାଇଥିବା ଅଭିଯୋଗ ଆଧାରରେ, ନେଟଫ୍ଲିକ୍ସ ଅଧିକାରୀ ମୋନିକା ସେର୍ଗିଲ୍ ଏବଂ ଅମ୍ବିକା ଖୁରାନାଙ୍କ ବିରୋଧରେ ଭାରତୀୟ ଦଣ୍ଡବିଧି ସଂହିତା (ଆଇପିସି)ର ଧାରା 295 (ଏ) (ଧାର୍ମିକ ଭାବନା ଏବଂ ବିଶ୍ବାସକୁ ଅପମାନିତ କରିବା) ଉପରେ ଏକ ଏଫଆଇଆର ଦାଏର ହୋଇଛି । ଏକ ଭିଡିଓ ଜାରି କରି ଏହି ବୟାନ ଦେଇଛନ୍ତି ନରୋତ୍ତମ ।

ପ୍ରକାଶ ଥାଉକି ମୋନିକା ନେଟଫ୍ଲିକ୍ସ ଇଣ୍ଡିଆର ଉପ-ସଭାପତି ହୋଇଥିବାବେଳେ ଖୁରାନା ଷ୍ଟ୍ରିମିଂ ପ୍ଲାଟଫର୍ମରେ ପବ୍ଲିକ୍ ପଲିସିର ନିର୍ଦ୍ଦେଶକ । ରବିବାର ଦିନ ମିଶ୍ର ୱେବ ସିରିଜ ନିର୍ମାତାଙ୍କ ବିରୋଧରେ ସମ୍ଭାବ୍ୟ ଆଇନଗତ କାର୍ଯ୍ୟାନୁଷ୍ଠାନ ବିଷୟରେ ସୂଚନା ଦେଇଥିଲେ । ଯେଉଁଥିରେ ସେ କହିଥିଲେ ରାଜ୍ୟ ପୋଲିସକୁ ମୀରା ନାୟାରଙ୍କ ୱେବ ସିରିଜ ଯାଞ୍ଚ କରିବାକୁ କୁହାଯାଇଛି ଯେ ଶୋରେ କିସ୍ ସିନ୍ ଏକ ମନ୍ଦିରରେ ସୁଟିଂ ହୋଇଛି କି ନାହିଁ ।

‘ଏ ସ୍ବିଟେବୁଲ୍ ବୟ’ ନିକଟରେ ଭାରତ ନେଟଫ୍ଲିକ୍ସରେ ରିଲିଜ ହୋଇଥିଲା । ଏକ ମନ୍ଦିର ଭିତରେ କିସ୍ ସିନ୍ ସୁଟିଂ କରାଯାଇଥିଲା ଯେଉଁଥିରେ ପୃଷ୍ଠଭୂମିରେ ଭଜନ ଗାନ କରାଯାଇଥିଲା । ଯାହାକୁ ଆଧାର କରି ନରୋତ୍ତମ କହିଥିଲେ, ମୁଁ ଏହାକୁ ଆପତ୍ତିଜନକ ମନେ କରେ । ମୁଁ ଭାବୁଛି ଏହା ଭାବନାକୁ ଆଘାତ ଦେଇଛି । ଯାହା ଉପରେ କାର୍ଯ୍ୟାନୁଷ୍ଠାନ ନିଆଯିବ ।