ପୁଣି ପରଦାରେ ଆକ୍ସନ-ରୋମାନ୍ସର ତଡକା, ଆସିବ ‘ମଲଙ୍ଗ’ ସିକ୍ବେଲ

ଲକଡାଉନର ଚତୁର୍ଥ ପର୍ଯ୍ୟାୟରେ ଓଟିଟି ପ୍ଲାଟଫର୍ମରେ ଟ୍ରେଣ୍ଡ କରୁଛି ମଲ୍ଟି ଷ୍ଟାରର ଫିଲ୍ମ ‘ମଲଙ୍ଗ’। ଏହାର ସିକ୍ବେଲକୁ ନେଇ ଚର୍ଚ୍ଚା।

ମୁମ୍ବାଇ: ନିକଟରେ ରିଲିଜ ହୋଇଥିବା ନିର୍ମାତା ମୋହିତ ସୁରୀଙ୍କ ରୋମାଣ୍ଟିକ, ଥ୍ରିଲର ଫିଲ୍ମ ‘ମଲଙ୍ଗ’ ଡିଜିଟାଲ ପ୍ଲାଟଫର୍ମରେ ରିଲିଜ ହୋଇଯାଇଛି। ଯାହାକୁ ନେଇ ଉତ୍ସାହିତ ଦର୍ଶକ। ନେଟଫ୍ଲିକ୍ସରେ ରିଲିଜ ହେବା ମାତ୍ରେ ପାଖାପାଖି 12ଟି ଦେଶରେ ଟପ 10ରେ ଟ୍ରେଣ୍ଡ କରୁଛି ଫିଲ୍ମ।

ଏହାସହ ଏବେ ଦର୍ଶକଙ୍କ ପାଇଁ ଆଉ ଏକ ଗୁଡନ୍ୟୁଜ ସାମ୍ନାକୁ ଆସିଛି। ଯାହାକୁ ନେଇ ଖୁସି ହୋଇଯିବେ ସମସ୍ତେ। ଆଜ୍ଞା ହଁ, ଖୁବଶୀଘ୍ର ନିର୍ମାଣ ହେବାକୁ ଯାଉଛି ଏହାର ସିକ୍ବେଲ ଫିଲ୍ମ। ଫିଲ୍ମର ବଡ ସଫଳତାକୁ ଦୃଷ୍ଟିରେ ରଖି ମେକର୍ସ ସିକ୍ବେଲକୁ ନେଇ ଯୋଜନା ଚଳାଇଛନ୍ତି। ଫିଲ୍ମ ସିକ୍ବେଲ ପାଇଁ ମୋହିତ ବର୍ତ୍ତମାନ ପ୍ରସ୍ତୁତ ହୋଇସାରିଲେଣି ।

ଏହାର ସୂଚନା ମେକର୍ସ ଦେଇଛନ୍ତି । ଫିଲ୍ମରେ ଆଦିତ୍ୟ ରାୟ କପୁର ଓ ଦିଶା ପଟାନୀଙ୍କ ଜବରଦସ୍ତ ରୋମାନ୍ସ ଦେଖିବାକୁ ପାଇଥିଲେ ଦର୍ଶକ। ସେହିପରି ମିଷ୍ଟର ଝକାସ୍ ଅନିଲ କପୁର ଓ କୁନାଲ ଖେମୁଙ୍କ ଦମଦାର ଅଭିନୟ ସମସ୍ତଙ୍କ ମନ କିଣିଥିଲା।

ମ୍ୟୁଜିକାଲ ରୋମାଣ୍ଟିକ ଆକ୍ସନ ଥ୍ରିଲର ଫିଲ୍ମ ‘ମଲଙ୍ଗ’ ଘୋରେଇ ବକ୍ସ-ଅଫିସରେ 59 କୋଟି ଟଙ୍କାରୁ ଅଧିକ ଆୟ କରି ହିଟ୍ ସାବ୍ୟସ୍ତ ହୋଇଥିଲା । ପ୍ରକାଶ ଥାଉକି କିଛି ଦିନ ପୂର୍ବରୁ ଫିଲ୍ମର ସବୁ ଷ୍ଟାର୍ସ ଭର୍ଚ୍ୟୁଆଲ ରିୟୁନିୟନ କରିଥିଲେ।