ମୁମ୍ବାଇ: ରିଲିଜ ହୋଇଯାଇଛି ପପୁଲାର ୱେବ ସିରିଜ ‘ମିର୍ଜାପୁର 2’ ଆମାଜନ ପ୍ରାଇମ ଭିଡିଓରେ । ଆଉ ରିଲିଜ ହେବା ମାତ୍ରେ ଦର୍ଶକଙ୍କୁ ଦିୱାନା କରିଛି ସିରିଜ । ଦୀର୍ଘ ସମୟରୁ ଏହାକୁ ଦେଖିବା ପାଇଁ ଅପେକ୍ଷା କରିଥିଲେ ସମସ୍ତେ । ହେଲେ ଇତିମଧ୍ୟରେ ମେକର୍ସଙ୍କ ପାଇଁ ନୂଆ ସମସ୍ୟା ଉପୁଜିଛି । ଯାହାଦ୍ବାରା ମେକର୍ସଙ୍କୁ ବଡ ଝଟକା ଲାଗିବାର ଆଶଙ୍କା ଅଛି ।
କଥାଟି ହେଲା ଯେ ଉତ୍ତରପ୍ରଦେଶର ମିର୍ଜାପୁର ଜିଲ୍ଲାର ସାଂସଦ ଓ ପାର୍ଟି ଏସର ରାଷ୍ଟ୍ରୀୟ ଅଧ୍ୟକ୍ଷ ଅନୁପ୍ରିୟା ପଟେଲ ସିରିଜ ବିରୋଧରେ ଯାଞ୍ଚ କରିବାର ଦାବି କରିଛନ୍ତି । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସିରିଜ ବିରୋଧରେ ଏକ ଟ୍ବିଟ ଟ୍ୟାଗ କରିଛନ୍ତି।
ଆଉ ଯେଉଁଥିରେ ଲେଖିଛନ୍ତି, ‘ମିର୍ଜାପୁର ୱେବ ସିରିଜ ମାଧ୍ୟମରେ ଏହାକୁ ଏକ ହିଂସାତ୍ମକ କ୍ଷେତ୍ର ଭାବରେ ବଦନାମ କରାଯାଉଛି | ଏହି ଶୃଙ୍ଖଳା ମାଧ୍ୟମରେ ଜାତିଗତ ଅସହଯୋଗ ମଧ୍ୟ ବ୍ୟାପୁଛି। ମିର୍ଜାପୁର ଜିଲ୍ଲାର ସାଂସଦ ହୋଇଥିବାରୁ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ମୁଁ ଦାବି କରୁଛି। ପିଏମ ଏବଂ ସିଏମଙ୍କ ନେତୃତ୍ବରେ ମିର୍ଜାପୁର ବିକାଶରେ ଅଛି ଏବଂ ଏହା ସାମାଜିକ ସମନ୍ବୟର କେନ୍ଦ୍ର ଅଟେ।’
ପ୍ରକାଶ ଥାଉକି ‘ମିର୍ଜାପୁର 2’ ଶୁକ୍ରବାର ରିଲିଜ ହେବାର ଥିଲା ହେଲେ ମେକର୍ସ ଏହାର କିଛି ଘଣ୍ଟା ପୂର୍ବରୁ ତଥା ଗୁରୁବାର ବିଳମ୍ବିତ ରାତିରେ ରିଲିଜ କରିଥିଲେ । ଏହି ଲୋକପ୍ରିୟ ସିରିଜରେ ପଙ୍କଜ ତ୍ରିପାଠୀ, ଅଲ୍ଲୀ ଫଜଲ, ଦିବ୍ୟେନ୍ଦୁ ଶର୍ମା, ଶ୍ବେତା ତ୍ରିପାଠୀ, ରସିକା ଦୁଗଲ ଭଳି କଳାକାର ଶାନଦାର ଅଭିନୟ କରିଛନ୍ତି । ଏହାର ପ୍ରଥମ ସିଜନ ମିର୍ଜାପୁର ମଧ୍ୟ ହିଟ୍ ହୋଇଥିଲା ।
