‘ୟେ ରିସ୍ତା କ୍ୟା କହଲାତା ହେ’ରେ କମେଡି ଅଭିନେତା ମନୋଜଙ୍କ ଏଣ୍ଟ୍ରି

ଫିଲ୍ମ ପରେ ଏବେ ଷ୍ଟାର ପ୍ଲସର ଫେମସ ଧାରାବାହିକ ୟେ ‘ରିସ୍ତା କ୍ୟା କହଲାତା’ରେ ନଜର ଆସିବେ ଲୋକପ୍ରିୟ ଅଭିନେତା ମନୋଜ ଯୋଶୀ।

ମୁମ୍ବାଇ: ରାଜନ ଶାହୀଙ୍କ ପପୁଲାର ଧାରାବାହିକ ‘ୟେ ରିସ୍ତା କ୍ୟା କହଲାତା ହେ’ ରେ ପ୍ରାୟତଃ ନୂଆ ନୂଆ ଟ୍ବିଷ୍ଟ ଦେଖିବାକୁ ପାଇଛନ୍ତି ଦର୍ଶକ। ଏବେ ଶୋକୁ ନେଇ ନୂଆ ଖବର ସାମ୍ନାକୁ ଆସିଛି। ଯାହାକୁ ନେଇ ଖୁସି ହୋଇଯିବେ ଦର୍ଶକ। ଶୁଣିବାକୁ ମିଳୁଛି ଯେ ଖୁବଶୀଘ୍ର ଏହି ଧାରାବାହିକରେ ଆଉ ଜଣେ ଫେମସ ଅଭିନେତା ସମ୍ପୃକ୍ତ ହେବାକୁ ଯାଉଛନ୍ତି। ସେ ଆଉ କେହି ନୁହନ୍ତି ସେ ହେଲେ ବଲିଉଡର କମେଡି ଅଭିନେତା ମନୋଜ ଯୋଶୀ । ଏହି ଶୋରେ ତାଙ୍କର ଭିନ୍ନ ଅବତାର ଦେଖିବାକୁ ପାଇବେ ଦର୍ଶକ।

ଏହି ଖବରକୁ କନଫର୍ମ କରାଇଛନ୍ତି ସେ ନିଜେ । ଏକ ସାକ୍ଷାତକାରରେ ସେ ଯୋଗ ଦେଇ ଏହାର ଖୁଲାସା କରିଥିଲେ। ସେ କହିଥିଲେ ଯେ ଧାରାବାହିକରେ ସେ ଶକ୍ତିମାନ ଝାଭେରୀଙ୍କ ଭୂମିକାରେ ଅଭିନୟ କରିବେ। ଯିଏ ପେଷାରେ ଜଣେ ଓକିଲ। ଶୋରେ ତାଙ୍କ ଭୂମିକା ଦମଦାର ହେବାକୁ ଯାଉଛି। ତାଙ୍କୁ ବିଶ୍ବାସ ଅଛି ଯେ ଶୋରେ ତାଙ୍କ ଅଭିନୟକୁ ଦର୍ଶକ ପସନ୍ଦ କରିବେ।

ପ୍ରକାଶ ଥାଉକି ‘ହଙ୍ଗାମା’, ‘ଫିର ହେରା ଫେରି’, ‘ଭାଗମ ଭାଗ’, ‘ଗୋଲମାଲ’, ‘ଭୁଲ ଭୁଲୈୟା’ ଭଳି ଫିଲ୍ମରେ ଶାନଦାର କମେଡି କରି ଦର୍ଶକଙ୍କ ମନ କିଣିବାରେ ସଫଳ ମନୋଜ। ଏବେ ତାଙ୍କୁ ଧାରାବାହିକରେ ଦେଖିବାକୁ ନେଇ ଉତ୍ସାହିତ ଦର୍ଶକ।