ହାଇଦ୍ରାବାଦ: ବଲିଉଡ ଅଭିନେତା ଶାହାରୁଖ ଖାନଙ୍କ ପରି ତାଙ୍କ ଘର 'ମନ୍ନତ' ମଧ୍ୟ ସବୁବେଳେ ଥାଏ ଚର୍ଚ୍ଚାରେ । ତାଙ୍କ ଘର ବାହାରେ ସବୁବେଳେ ଜମିଥାଏ ଫ୍ୟାନ୍ସଙ୍କ ଖଚାଖଚ୍ ଭିଡ । ଏଥର କିନ୍ତୁ ଶାହାରୁଖ ଖାନଙ୍କ ଘର କୌଣସି ଭଲ କାମ ପାଇଁ ନୁହେଁ ବରଂ ଖରାପ ଖବରକୁ ନେଇ ଚର୍ଚ୍ଚାରେ ଅଛି। ଜଣେ ବ୍ୟକ୍ତି 'ମନ୍ନତ'କୁ ବମ୍ ପକାଇ ଉଡାଇବେ ବୋଲି ଧମକ ଦେଇଥିଲେ । ଯାହାକୁ ପୋଲିସ ଏବେ ଗିରଫ କରିଛି । ତେବେ ଏହି ଘଟଣାଟି ସୋମବାର ଘଟିଥିଲା ।
ଜବଲପୁରରେ ରହୁଥିବା ଜିତେଶ ଠାକୁର ମୁମ୍ବାଇ ପୋଲିସ କଣ୍ଟ୍ରୋଲ ରୁ୍ମ୍କୁ ଫୋନ କରି ଶାହାରୁଖ ଖାନଙ୍କ ବଙ୍ଗଳା ଏବଂ ମୁମ୍ବାଇର କିଛି ଖାସ୍ ସ୍ଥାନକୁ ବମ୍ରେ ଉଡାଇବା ପାଇଁ ଧମକ ଦେଇଥିଲେ । ତେବେ ମୁମ୍ବାଇ ପୋଲିସର ସୂଚନା ପରେ ଜବଲପୁର ପୋଲିସ ଅଭିଯୁକ୍ତ ଜିତେଶ ଠାକୁରଙ୍କୁ ଗିରଫ କରିଛି । ଅଭିଯୁକ୍ତ ବିରୁଦ୍ଧରେ ଆଇପିସି ଧାରା ୧୮୨, ୫୦୫ ଏବଂ ୫୦୬ ଆଧାରରେ ଗିରଫ କରାଯାଇଛି ।