ମୁମ୍ବାଇ: ପପୁଲାର ନିର୍ମାତା ମହେଶ ଭଟ୍ଟଙ୍କ ନିର୍ଦ୍ଦେଶିତ ‘ସଡକ 2’ ଫିଲ୍ମ ଶୁକ୍ରବାର ଓଟିଟି ପ୍ଲାଟଫର୍ମ ଡିଜନି ପ୍ଲସ ହଟଷ୍ଟାରରେ ରିଲିଜ ହୋଇଯାଇଛି । ଦୀର୍ଘ ସମୟରୁ ଚର୍ଚ୍ଚାରେ ଥିବା ଏହି ମଲ୍ଟି ଷ୍ଟାରର ଫିଲ୍ମକୁ ସବୁଠୁ ଖରାପ ରେଟିଂ ମିଳିଛି । ଯାହାକୁ ନେଇ ଚିନ୍ତିତ ମେକର୍ସ । ଆଜ୍ଞା ହଁ, ୱେବସାଇଟ IMDBରେ ‘ସଡକ 2’କୁ 10 ପଏଣ୍ଟରୁ ମାତ୍ର 1.1 ରେଟିଂ ଦିଆଯାଇଛି । ଏଥିରୁ ଜଣାପଡୁଛି ଯେ ଫିଲ୍ମକୁ ଦର୍ଶକ ଆଦୌ ପସନ୍ଦ କରିନାହାଁନ୍ତି ।
ସେହିପରି ସୋସିଆଲ ମିଡିଆ ୟୁଜର୍ସ ଫିଲ୍ମକୁ ନେଇ ନେଗେଟିଭ କମେଣ୍ଟ କରିବାରେ ଲାଗିଛନ୍ତି । କିଛି ୟୁଜର୍ସ ଫିଲ୍ମକୁ ଫ୍ଲପ କହୁଛନ୍ତି ତ ଆଉ କିଛି କହୁଛନ୍ତି ଫିଲ୍ମ ଦେଖି ସମୟ ନଷ୍ଟ କରିବା କଥା ।
ପ୍ରକାଶ ଥାଉକି ମହେଶ ଏହି ଫିଲ୍ମ ଜରିଆରେ ପାଖାପାଖି 21 ବର୍ଷ ପରେ ନିର୍ଦ୍ଦେଶନାକୁ ପୁଣି ଫେରିଛନ୍ତି । ‘ସଡକ 2’ 1991ରେ ଆସିଥିବା ସଞ୍ଜୟ ଦତ୍ତ ଓ ପୂଜା ଭଟ୍ଟଙ୍କ ସୁପରଡୁପର ହିଟ୍ ଫିଲ୍ମ ‘ସଡକ’ର ସିକ୍ବେଲ ଫିଲ୍ମ । ‘ସଡକ 2’ରେ ସଞ୍ଜୟ, ପୂଜାଙ୍କ ବ୍ୟତୀତ ଆଲିୟା ଭଟ୍ଟ ଓ ଆଦିତ୍ୟ ରାୟ କପୁର ମଧ୍ୟ ମୁଖ୍ୟ ଭୂମିକାରେ ଅଭିନୟ କରୁଥିବାର ନଜର ଆସୁଛନ୍ତି ।
ଖରାପ ରେଟିଂ ବ୍ୟତୀତ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପରଠୁ ଅନେକ ଦର୍ଶକ ବଲିଉଡ ଉପରେ ପରିବାରବାଦ ଅଭିଯୋଗ ଲଗାଇଆସୁଛନ୍ତି । ସେହିପରି ଯେଉଁ ଫିଲ୍ମରେ ପରିବାରବାଦ ଝଲକ ଦେଖିବାକୁ ମିଳୁଛି ସେହି ଫିଲ୍ମକୁ ବୟକଟ କରିବାକୁ ମଧ୍ୟ ଦାବି କରାଯାଉଛି । ପୂର୍ବରୁ ‘ସଡକ 2’ର ଟ୍ରେଲରକୁ ୟୁଟ୍ୟୁବରେ ଲାଇକଠୁ ଅଧିକ ଡିସଲାଇକ କରିଥିଲେ ଦର୍ଶକ ।
