ଦୀପିକାଙ୍କୁ ସମ୍ମାନିତ କରିବେ ମଧ୍ୟପ୍ରଦେଶ ସରକାର

ପ୍ରଥମେ ଦୀପିକାଙ୍କ ଫିଲ୍ମ ‘ଛପାକ’ କୁ ମଧ୍ୟପ୍ରଦେଶ ଓ ଛତିଶଗଡରେ ଟ୍ୟାକ୍ର ଫ୍ରି କରାଯାଇଥିଲା । ଆଉ ଆସନ୍ତା ମାର୍ଚ୍ଚରେ ମଧ୍ୟପ୍ରଦେଶରେ ଆୟୋଜିତ ହେବାକୁ ଯାଉଥିବା ଆଇଫା ଆୱାର୍ଡରେ ଦୀପିକାକୁ ସମ୍ମାନିତ କରାଯିବ ବୋଲି ଘୋଷଣା କରିଛନ୍ତି ମଧ୍ୟପ୍ରଦେଶ ସରକାର।

ମଧ୍ୟପ୍ରଦେଶ: ଦୀପିକା ପାଦୁକୋନଙ୍କ ଚର୍ଚ୍ଚିତ ଫିଲ୍ମ ‘ଛପାକ’କୁ ନେଇ ଦେଶର ଜନତା ଦୁଇଭାଗରେ ବାଣ୍ଟି ହୋଇଯାଇଛନ୍ତି । କିଛି ତାଙ୍କର ଫିଲ୍ମକୁ ବିରୋଧ କରି ସୋସିଆଲ ମିଡିଆରେ ‘ବଏକଟ ଛପାକ’ ଟ୍ରେଣ୍ଡ କରାଇଥିବା ବେଳେ ଆଉ କିଛି ଫିଲ୍ମ ଟିକେଟ ସୋସିଆଲ ମିଡିଆରେ ସେୟାର କରି ତାଙ୍କର ସମର୍ଥନ କରୁଥିବା ନଜର ଆସୁଛନ୍ତି। ସେହିପରି କଂଗ୍ରେସ ଶାସିତ କିଛି ରାଜ୍ୟରେ ଏହି ଫିଲ୍ମକୁ ଟ୍ୟାକ୍ସ ଫ୍ରି ମଧ୍ୟ କରାଯାଇଛି। ଯେଉଁଥିରେ ମଧ୍ୟପ୍ରଦେଶ ସାମିଲ ଅଛି।

ଇତିମଧ୍ୟରେ ଶୁଣିବାକୁ ମିଳୁଛି ଯେ ଦୀପିକାଙ୍କୁ ମଧ୍ୟପ୍ରଦେଶ ସରକାର ସମ୍ମାନିତ ମଧ୍ୟ କରିବେ। ମଧ୍ୟ ପ୍ରଦେଶ ସରକାରଙ୍କ ଜନସମ୍ପର୍କ ମନ୍ତ୍ରୀ ପିସି ଶର୍ମା ଏନେଇ କହିଛନ୍ତି ଯେ, ମଧ୍ୟପ୍ରଦେଶରେ ଆୟୋଜିତ ହେବାକୁ ଥିବା ଏଥର ଆଇଫା ଆୱାର୍ଡରେ ଦୀପିକାଙ୍କୁ ସମ୍ମାନିତ କରାଯିବ।

ପ୍ରାୟ 3 ଦିନ ଧରି ଆୟୋଜିତ ହେବାକୁ ଯାଉଥିବା ଆଇଫା ଆୱାର୍ଡ ଆସନ୍ତା ମାର୍ଚ୍ଚ 19ରୁ ଆରମ୍ଭ ହୋଇ 21 ତାରିଖ ପର୍ଯ୍ୟନ୍ଚ ଚାଲିବ। ସେହିପରି ମାର୍ଚ୍ଚ 19ରେ ଭୋପାଳରେ ଏହି ଶୋ’ ହେବାକୁ ଯାଉଥିବା ବେଳେ 20 ଏବଂ 21 ତାରିଖରେ ଇନ୍ଦୋରରେ ଆୟୋଜିତ ହେବ। ଏହି ଆୱାର୍ଡ ଶୋରେ ଦୀପିକାଙ୍କୁ ମଧ୍ୟ ପ୍ରଦେଶ ସରକାର ସମ୍ମାନିତ କରିବେ।

ଜେଏନୟୁରେ ଗତ ରବିବାର ହୋଇଥିବା ଆକ୍ରମଣ ପରଠୁ ଛାତ୍ରଛାତ୍ରୀଙ୍କ ବିରୋଧ ପ୍ରଦର୍ଶନ ଚାଲିଛି। ଏହି ପ୍ରଦର୍ଶନରେ ଦୀପିକା ଗତ ମଙ୍ଗଳବାର ସାମିଲ ହୋଇଥିଲେ । ଏହାକୁ ଆଧାର କରି କିଛି ଲୋକ ତାଙ୍କର ବିରୋଧ କରି ଛପାକ ଫିଲ୍ମର ବଏକଟ କରିବାକୁ ସୋସିଆଲ ମିଡିଆରେ କହିଥିଲେ । ଯାହାପରେ କଂଗ୍ରେସ ସରକାର ଫିଲ୍ମର ଟ୍ୟାକ୍ସ ଫ୍ରି କରିଥିଲେ।