ନରେନ୍ଦ୍ର ଭାଇଙ୍କୁ ଲତା ଦିଦିଙ୍କ ରାକ୍ଷୀ

ଭିଡିଓ ଦ୍ବାରା ପ୍ରଧାନମନ୍ତ୍ରୀ ମୋଦିଙ୍କୁ ରାକ୍ଷୀର ଶୁଭେଚ୍ଛା ଜଣାଇଲେ ସୁର ସାମ୍ରାଜ୍ଞୀ ଲତା ମଙ୍ଗେସକର । ମୋଦି ଜଣାଇଲେ କୃତଜ୍ଞତା । ଅଧିକ ପଢ଼ନ୍ତୁ...

ମୁମ୍ବାଇ:(ସୋମବାର) ପବିତ୍ର ରକ୍ଷା ବନ୍ଧନ । ସାରା ଦେଶରେ ଉତ୍ସବର ମାହୋଲ । ସବୁ ଭଉଣୀ ନିଜ ନିଜ ଭାଇ ହାତରେ ବାନ୍ଧିଛନ୍ତି ରାକ୍ଷୀ । ସେପଟେ ଅନେକ ଭାଇ ଭଉଣୀ ଏମିତି ବି ଅଛନ୍ତି ଯେଉଁମାନେ ପରସ୍ପର ଠାରୁ ଦୂରରେ ରହିଛନ୍ତି । ସେମିତି ଜଣେ ଭଉଣୀ ହେଉଛନ୍ତି ଲତା ମଙ୍ଗେଶକର । ଯିଏ ଟ୍ବିଟ କରି ତାଙ୍କ ଭାଇଙ୍କୁ ମନେ ପକାଇଛନ୍ତି । ତେବେ ଯଦି ଆପଣ ଭାବୁଛନ୍ତି ଯେ ଲତା ତାଙ୍କ ଭାଇ ହୃଦୟନାଥ ମଙ୍ଗେଶଙ୍କର କଥା ଟ୍ବିଟ କରିଛନ୍ତି ତେବେ ଆପଣ ଭୁଲ ଭାବୁଛନ୍ତି । ଲତା ଟ୍ବିଟ କରିଛନ୍ତି ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉଦ୍ଦେଶ୍ୟରେ ।

ଲତା ନିଜ କଥା ରେକର୍ଡ କରି ଏକ ଭିଡିଓ ଟ୍ବିଟରରେ ପୋଷ୍ଟ କରିଛନ୍ତି । ସେ ଏଥିରେ କହିଛନ୍ତି ‘‘ନରେନ୍ଦ୍ର ଭାଇ ଆଜି ରାକ୍ଷୀର ଶୁଭ ଅବସରରେ ମୁଁ ଆପଣଙ୍କୁ ପ୍ରଣାମ କରୁଛି । ରାକ୍ଷୀ ତ ମୁଁ ଆଜି ପଠାଇ ପାରିନି ଯାହାର କାରଣ ସାରା ବିଶ୍ବ ଜାଣିଛି । ନରେନ୍ଦ୍ର ଭାଇ ଆପଣ ନିଜ ଦେଶ ପାଇଁ ଏତେ କାମ କରିଛନ୍ତି ଓ ଏତେ ଭଲ କଥା କହିଛନ୍ତି ଯାହାକୁ ଦେଶବାସୀ କେବେ ଭୁଲି ପାରିବେନି । ଆଜି ଭାରତର ଲକ୍ଷ, ଲକ୍ଷ, କୋଟି କୋଟି ମହିଳା ଆପଣଙ୍କ ଆଡକୁ ରାକ୍ଷୀ ବାନ୍ଧିବା ପାଇଁ ତାଙ୍କ ହାତ ଆଗକୁ କରିଛନ୍ତି କିନ୍ତୁ ରାକ୍ଷୀ ବାନ୍ଧିବା କଠିନ ହୋଇଛି । ଆପଣ ନିଶ୍ଚୟ ବୁଝିପାରୁଥିବେ । ତେବେ ଯଦି ସମ୍ଭବ ହୁଏ ଆପଣ ପ୍ରତିଶୃତି ଦିଅନ୍ତୁ ଯେ ଆପଣ ଭାରତକଉ ଆହୁରି ଉଚ୍ଚକୁ ନେଇଯିବେ । ନମସ୍କାର ।’’

ତେବେ ପ୍ରଧାନମନ୍ତ୍ରୀ ମୋଦି ମଧ୍ୟ ଅବିଳମ୍ବେ ଏହାର ଉତ୍ତର ଦେଇ ଟ୍ବିଟ କରିଛନ୍ତି । ସେ ଲେଖିଛନ୍ତି ଯେ, ‘‘ଲତା ଦିଦି, ରକ୍ଷା ବନ୍ଧନର ଏହି ଶୁଭ ଅବସରରେ ଆପଣଙ୍କ ଏହି ଭାବପୂର୍ଣ୍ଣ ସନ୍ଦେଶ ଅଶୀମ ପ୍ରେରଣା ଓ ଶକ୍ତି ପ୍ରଦାନ କରୁଛି । କୋଟି କୋଟି ମା-ଭଉଣୀଙ୍କ ଆଶୀର୍ବାଦରୁ ଆମ ଦେଶ ନୂତନ ଶୀର୍ଷରେ ପହଁଞ୍ଚିବ, ନୂଆ ନୂଆ ସଫଳତା ପ୍ରାପ୍ତ କରିବ । ଆପଣ ସୁସ୍ଥ ରୁହନ୍ତୁ ଓ ଦୀର୍ଘାୟୁ ହୁଅନ୍ତୁ, ଇଶ୍ବରଙ୍କ ନିକଟରେ ମୋର ଏହା ହିଁ ପ୍ରାର୍ଥନା ।’’